सुबास हुमागाईं, काठमाडौं

मिडफिल्डर एरिक विष्ट दुई साता बढीको क्वारेन्टिनपछि अन्तत: कोरोना संक्रमणबाट मुक्त भएका छन् । मैदानभित्र एक पछि अर्को चुनौती पार गर्दै आएका विष्टले दुई साता बढी आइसोलेसनमा बसेपछि कोरोनामाथि जित हासिल गरे । मैदानभित्र उमेर समूह हुँदै सिनियर टोलीको छनोटसम्म जति कठिन यात्रा उनले तय गरे, कोरोना पराजित गर्न उनलाई खासै कठिन भने भएन ।

दुई साताअघि पहिलो पटक स्वाब लिएर गरिएको पहिलो परिक्षणमा केहि समस्या देखिएपछि उनले दोस्रो पटक स्वाब दिएका थिए । दुवै स्वाबको परिक्षणमा पछि कोरोना संक्रमण देखिएपछि उनी दुई साता आइसोलेसनमा बसे । शुक्रबार स्वाब दिएका उनको केहि दिनको प्रतिक्षापछि बुधबार रिपोर्ट नेगेटिभ आएको छ ।

राष्ट्रिय टोलीको प्रारम्भिक टोलीमा पहिलो पटक छनोट भएका विष्टका लागि पछिल्लो दुई साता कठिन रहयो । कोरोना संक्रमणले भन्दापनि त्यसपछि उनलाई थपिएको मानसिक तनाव परास्त गर्न उनले निकै कसरत गर्नुपर्यो । संक्रमण पुष्टि नहुँदै केहि संचारमाध्यमले उनको परिचयसहित समाचार प्रकाशन गरेपछि सामाजिक संजालबाट उनले अनेक प्रतिक्रियाको सामना गर्नुपर्यो ।

‘ मलाई संक्रमणका दौरान कुनै शारीरिक कमजोरी महसुस भएन । लक्षण देखिएको पनि थिएन । सुरुमा त पुन: परिक्षण भनिएकोले स्वाब लिंदा केहि गल्ति भएको बुझें । पछि पुन: स्वाब पनि दिएँ, र अगाडीको समेत पोजेटिभ नै आयो,’ एरिकले सुनाए, ‘ संक्रमण भएपनि यसलाई पराजित गर्न सक्छु भन्नेमा मानसिक रुपमा तयार थिएँ । पहिलो नतिजाको नतिजा सुनेर शंका लागेपछि नै म घरमै आइसोलेसनमा बसें ।’

एरिकले शारीरिक रुपमा केहि समस्या नआएपनि उनलाई दिइएको प्रतिक्रिया र टिप्पणीले भने चित्त दुखेको बताए । ‘ संक्रमण भएपछि खाली समय बिताउन सामाजिक संजाल हेर्थें । मान्छेहरुले मलाई दिएको प्रतिक्रियाले निकै चित्त दुख्यो । एक खेलाडीलाई त यस्तो गर्छन भने सामान्य मानिसलाई बाहिर जिल्लामा कस्तो होला जस्तो पनि लाग्यो । त्यस्तो पक्षलाई ध्यान नदिएर बसिरहें,’ उनले सुनाए, ‘सुरुवातका केहि दिन आफ्नो परिवारको चिन्ता थियो । ममीलाई अस्पताल लग्दा मलाई सरेको भन्ने लागेकोले वहाँको धेरै चिन्ता थियो । पछि सबैको नतिजा नेगेटिभ आएपछि ढुक्क भएँ । सहजै कोरोना जान्छ भने सोचेर बसें ।’

आइसोलेसनका दौरान स्वास्थ्य अवस्थालाई ध्यानमा राख्दै आवश्यक सबै पक्षमा सचेत रहेको उनले बताए । ‘ घरमा नै आइसोलेसन बस्न मिल्छ भनेपछि परिवारबाट छुट्टै बसें । नियमित रुपमा आफ्नो तापक्रम नापें । तातोपानी धेरै खाएँ । शारीरिक रुपमा केहि असहज महसुस भएन । फिटनेसका लागि आफैं सम्भव भएसम्म अभ्यास कोठाभित्र गरिरहें,’ उनले अनुभव सुनाए ।

कोरोना जितेका एरिक अब पुरानै जीवनशैलीमा फर्कने बताउँछन् । ‘ कोरोना लग्नु दुर्भाग्य थियो । यसलाई सहज रुपमा जित्न सकें । अब पुरानै दिनजस्तो आफ्नो फुटबलमा नै मिहिनेत गर्नेछु । राष्ट्रिय टोलीको प्रशिक्षणका लागि तयारी गर्नुछ । अहिलेको अवस्थामा चाडै खेल सुरु हुने देखिन्न । त्यसैले व्यक्तिगत रुपमा नै फिटनेसलाई ध्यानमा राखेर घरमा अभ्यास गर्नेछु,’ उनले सुनाए ।

मिडफिल्डर एरिक पछिल्लो सिजन मात्र ए डिभिजन क्लब न्यू रोड टिम (एनआरटि) सँग अनुबन्धित भएका थिए । आफ्नो छिमेकमै रहेको बि डिभिजन क्लब अराउन्ड द हिमालयज बाँसबारी क्लबको एकेडेमीमा हुर्केका एरिकले यू-१६ उमेर समूहमा एन्फा एकेडेमीमा पनि रहे । तर एन्फाको उक्त यू-१६ ब्याचमा रहेका ३५ खेलाडीमध्य अन्य सबैले एएफसी अथवा साफ च्याम्पियनसिप खेल्दा एरिक एक्ला खेलाडी थिए जसले अन्तर्राष्ट्रिय प्रतियोगिता खेल्न पाएनन् ।

एरिकले हरेस खाएनन् । एकेडेमीबाट यू-१६ उमेर समूहको प्रतियोगिता खेल्न नपाएपनि उनले एकेडेमी छाड्नेबितिक्कै आर्मीबाट ललित स्मृति यू-१७ प्रतियोगितामा खेल्ने भए । आर्मीले ललित स्मृतिको सुरुवाती दुई संस्करणमा उपाधि जित्दा उनले मिडफिल्ड सम्हालेका थिए ।

यू-१६ एकेडेमीमा : सेसेहाङ आङदेम्बे र राजन गुरुङ (माथि), राजीव लोप्चन, अभिषेक रिजाल र एरिक विष्ट (तल)

एकेडेमी छोडेर उनले घरेलु क्लब बाँसबारीबाट नियमित खेल्न थाले । बि डिभिजन लिगको पहिलो सिजनमा नै एरिकले नियमित पहिलो रोजाईमा मात्र खेलेनन् । टोलीको उत्कृष्ट मध्यका खेलाडीका रुपमा आफूलाई स्थापित गरे । सिनियर फुटबलमा पहिलो सिजन बाँसबारीको जर्सीमा खेल्दा हाल आफू खेलिरहेको एनआरटिविरुद्धको खेल उनलाई अझै याद छ ।

खेलको ८७ औं मिनेटसम्म २-१ को अग्रतामा रहेको एनआरटि ए डिभिजनमा उत्रने लक्ष्यसहित टोली निर्माण गरेको थियो । तर एरिकले खेलको अन्तिम समयमा नतिजा नै बदले । उनकै असिस्टमा खेलको २ मिनेट समय बाँकी रहँदा बाँसबारी बराबरीमा आयो । इन्ज्युरी समयमा एरिकले झन्डै २५ यार्ड टाढाबाट सानदार फ्रिकिक गोल गर्दै खेल बाँसबारीको पक्षमा पारे ।

बाँसबारीका लागि एनआरटिविरुद्ध फ्रिकिक गोलगरेपछि

बि डिभिजनमा प्रभावशाली प्रदर्शन गरेपछि एरिकले आर्मीलाई दोस्रो पटक पनि यू-१७ लिगमा उपाधि जिताएका थिए । आर्मीले करारमा राख्दै एरिकलाई सिनियर टोलीमा अवसर दियो । २०७५ सालको ए डिभिजन लिगमा उनले पहिलो खेलमा नै एनआरटिबाट डेब्यु समेत गरे । मोफसलमा आर्मीले लगातार उपाधि जित्दा पनि एरिक टोलीको साथ रहे ।

एरिक यू-१६ टोलीमा नपरेपनि सन् २०१७ मा यू-१८ टोलीसँग साफ च्याम्पियनसिप उपाधि जित्न भने सफल रहे । नेपालले भुटानमा उपाधि जित्दा एरिकले पहिलो रोजाईमा नै खेल खेले । लिगको अन्तिम खेलमा भारतविरुद्ध भने चोटका कारण उनले खेल्न सकेनन् । लगत्तै यू-२३ टोलीमा पनि उनले अवसर पाए । तर राष्ट्रिय टोलीका खेलाडी नै रहेकाले उनले मैदानमा उत्रन भने सकेनन् ।

आर्मीबाट यू-१७ लिग खेल्दै एरिक

एरिकको प्रदर्शनबाट प्रभावित एनआरटिले २०७६ सालको ए डिभिजनअघि उनलाई अनुबन्ध गर्ने प्रस्ताव गर्यो । आर्मीमा नियमित रुपमा पहिलो रोजाइमा खेल्न नपाउने र एनआरटिमा त्यो अवसर देखेपछि उनले छाड्ने निर्णय गरे । उनको एनआरटि जाने निर्णय सहित सावित भयो । लिग अवधिभर १२ खेल खेल्दै उनी २ खेलमा म्यान अफ द म्याच घोषित भए । एक खेल चोट र अर्को खेल दोहोरो पहेंलो कार्डका कारण गुमाएका थिए ।

लिगको उनको प्रदर्शनले राष्ट्रिय टोलीका प्रशिक्षक योहान कालिन पनि प्रभावित भए । मिडफिल्डको मध्यभागमा खेल्ने एरिक शारीरिक रुपमा पनि बलिया छन् । बक्स टु बक्स मिडफिल्डको भूमिकामा खेल्ने उनको सेट पिस पनि विपक्षी टोलीको लागि खतरा निम्त्याउने गर्दछ ।

राष्ट्रिय टोलीमा मिडफिल्डको भूमिकामा उत्रन प्रतिस्पर्धा निकै कडा छ । एरिक यसबारे जानकार छन् । अहिलेको अवसरको भरपुर सदुपयोग गर्दै अनुभव बटुल्न चाहन्छन् । ‘अहिले नै टिममा पर्ने भन्ने होइन । आफूले सकेको मिहिनेत गर्ने हो । यो उमेरमै राष्ट्रिय टोलीको प्रशिक्षणमा सहभागी भएको छु । यहाँ धेरै कुरा सिक्नेछु र त्यसलाई अबलम्बन गर्नेछु,’ उनले भने, ‘घरेलू फुटबलमा नियमित राम्रो प्रदर्शन गरेर नै राष्ट्रिय टोलीको आधार बन्ने हो । अहिले आफूलाई राम्रो खेलाडीको रुपमा विकास गर्न तल्लिन छु ।’

एरिकको सपना राष्ट्रिय टोलीबाट खेल्दै साफ च्याम्पियनसिप जित्नु हो । आफ्नो सपना पूरा गर्न आफूमात्र नभएर समग्र नेपाली फुटबलकै स्तर बढ्नुपर्ने उनले बुझेका छन् । त्यसैले आफ्नो खेल मात्र नभएर घरेलु लिगको स्तरोन्नति हुनुपर्ने उनी बताउँछन् ।

‘व्यक्तिगत रुपमा भन्नुपर्दा हरेक खेलाडीझैं मेरो पनि राष्ट्रिय टोलीबाट खेल्दै साफ च्याम्पियनसिप जित्ने सपना छ । तर त्यसका लागि हामीले निकै मिहिनेत गर्नुछ । हामीले सुरुमा हाम्रो घरेलू लिग बलियो बनाउनुपर्छ जस्तो लाग्छ । धेरै स्तरीय खेलाडी भए नै हाम्रो प्रदर्शन राम्रो हुने हो,’ एरिक भन्छन् ।

‘अहिले त कोरोनाले गर्दा खेल नै ठप्प छ । अब मैदान फर्केपछि हामीले राष्ट्रिय टोलीमात्र भन्दापनि समग्र लिगकै बारेमा सोच्नुपर्छ । लिग प्रतिस्पर्धात्मक हुँदै गए मात्र स्तरीय खेलाडी आउँछन् । त्यसपछि मात्र सफलताबारे सोच्न सकिन्छ ।’