एजेन्सी – स्पेनिस क्लब सेभिल्लाले रियल म्याड्रिडका आक्रामक मिडफिल्डर ओस्कार रोड्रिग्वेजलाई क्लबमा अनुबन्ध गरेको छ ।

दुई सिजन लोनमा स्पेनिस क्लब लेगानेसमा बिताएका २२ वर्षीय रोड्रिग्वेजलाई ५ वर्षको लागि सेभिल्लाले क्लबमा अनुबन्ध गर्न सफल भएको हो । यससँगै स्पेनिस मिडफिल्डर ओस्कार २०२५ को अन्त्यसम्म सेभिल्लामा रहनेछन् ।

ओस्कार १३.५ मिलियन युरोमा रमन सान्चेज पिजुवानमा आउन सहमत भएका हुन् । जसमा ७५ प्रतिशत ओस्कारले तथा २५ प्रतिशत रियलले प्राप्त गर्नेछन् । रियल म्याड्रिडको एकेडेमीमा हुर्किएका रोड्रिग्वेजले २ सिजन लेगानेसमा बिताउँदै ६४ खेलमा १३ गोल गरेका थिए ।

ओस्कार सन् २००९ मा रियल म्याड्रिडमा जोडिएका थिए । त्यसयता, २०१७ सम्म एकेडेमीमा बसेका रोड्रिग्वेजले रियलको ‘बी’ टिममा एक सिजन खेलेपछि लोनमा लेगानेस पुगेका थिए । जुलियन लोपेटेगुईको प्रशिक्षणमा यो सिजनको युरोपा लिग च्याम्पियन बनेको सेभिल्लामा आएका उनले अर्काे सिजन च्याम्पियन्स लिग खेल्नेछ ।

स्पेनको यु–१६ देखि यु–१९ को टोलीबाट प्रतिनिधित्व गरिसकेका रोड्रिग्वेजलाई स्पेनका प्रशिक्षक लुइस इनरिकेले सिनियर टोलीमा समेत समावेश गरेको छ । उनी सेप्टेम्बर पहिलो साता हुने युइएफए नेसन्स लिगको दुई खेल (जर्मनी र युक्रेन) विरुद्धको खेलको लागि पहिलोपटक सिनियर टोलीमा समावेश भएका छन् ।