एजेन्सी – कोलोम्बियन मिडफिल्डर हामेस रोड्रिग्वेज ला लिगा च्याम्पियन टोली रियल म्याड्रिड छाडेर प्रिमियर लिग टोली एभर्टन जाने सम्भावना बढेको छ ।

कोलम्बियन स्टार रियलका प्रशिक्षक जिनेदिन जिदानको रोजाईमा नयाँ सिजनमा पनि पर्ने सम्भावना कम भएकोले उनले प्रिमियर लिगतर्फ जान चाहेको बताइएको छ । अघिल्लो सिजन ला लिगा जित्दा रोड्रिग्वेजले खेल्ने खासै मौका पाएनन् ।

रोड्रिग्वेजले अर्को साता एभर्टनमा मेडिकल जाँच गराउने सम्भावना छ । उनी २५ देखि ३० मिलियन युरोमा सरुवा हुन सक्ने अनुमान गरिएको छ । रियलले आफ्नो योजनामा नरहेका कारण हामेस आफैंलाई क्लब छनोट गर्न सुझाव दिएको थियो । सन् २०१४ विश्व कपमा चर्चामा रहेको रोड्रिग्वेजले यसअघि पनि कार्लो एन्सेलोटीको प्रशिक्षणमा खेलिसकेका छन् ।

रियलमा हुँदा एन्सेलोटीले उनलाई पहिलो रोजाईमा खेलाउने गरेका थिए । रोड्रिग्वेज र एन्सेलोटीको सहकार्य बुन्डेसलिगा च्याम्पियन बायर्न म्युनिखमा पनि भएको थियो । रोड्रिग्वेज रियलबाट लोनमा बार्यन जाँदा त्यहाँ एन्सेलोटी प्रशिक्षक थिए । यदि अहिलेको चर्चा सफल भएमा एकपटक फेरि एन्सेलोटी र रोड्रिग्वेजबीच सहकार्य हुने भएको छ ।

हामेसले पछिल्लो सिजनको अन्त्यतिर टोलीमा अवसर नपाएपछि आफैं टोलीबाहिर रहने निर्णय लिएका थिए । प्रशिक्षक जिदानले पनि उनको निर्णयको सम्मान गर्दै उनलाई आफ्नो योजनामा समेटेनन् । जिदानले आफूलाई पर्याप्त अवसर नदिएको हामेसको चित्त दुखाइ थियो ।