एजेन्सी – क्याटलान क्लब बार्सिलोनाले सोमबारदेखि नयाँ सिजनको लागि प्रशिक्षण सुरुवात गर्दा पहिलो रोजाईका १७ खेलाडी अनुपस्थित रहने छन् ।

अनुपस्थित रहनेमा क्लबका कप्तान लियोनेल मेस्सीसँगै अन्य स्टार खेलाडीहरु रहेका छन् । बार्सिलोना छाड्ने चर्चामा रहेका मेस्सीले प्रशिक्षण जानुअघि कोरोनाको परिक्षण समेत गराएका थिएनन् ।

बार्सिलोनाले पहिलो रोजाईका खेलाडीहरु इन्ज्युरी, अन्तर्राष्ट्रिय ड्युटी र समर छुट्टीमा रहेका कारण टोलीको प्रशिक्षणमा सामेल हुन असमर्थ रहेको बताएका छन् ।

पहिलो रोजाईका गोलरक्षक मार्क आन्द्रे टेर स्टेगन चोटका कारण टोली बाहिर छन् । यसै सिजन क्लबमा अनुबन्ध गरिएका मिडफिल्डर मिरालेम प्यानिच कोरोना संक्रमणका कारण इटलीमा सेल्फ आइसोेलेसनमै रहेका छन् ।

यस्तै लोनमा जर्मन क्लब बायर्न म्युनिखमा रहेका च्याम्पियन्स लिग विजेता टोलीका सदस्य फिलिपे कौटिन्हो समर छुट्टीमा रहेका छन् । टोलीका नयाँ प्रशिक्षक रोनाल्ड कोम्यानले प्रशिक्षणमा एकेडेमीका खेलाडीलाई समावेश गर्दै प्रशिक्षण शुरुवात गर्दैछन् ।

फ्रेन्की डि जोङ, सर्जियो बुस्क्वेट्स, क्लेमेन्ट लेङ्लेट, एन्टोइन ग्रिजमन, फ्रान्सिस्को ट्रिन्काओ, नेल्सन सेमेडो, मार्टिन ब्रेथवेट, अन्सु फाती, इनाकी पेना, रिकी पुच, जुवान मिरान्डा, कार्लेस एलेना र पेड्री प्रशिक्षणमा सामेल छैनन् ।

यसबाहेक बाँकी खेलाडीहरु पनि छिट्टै नै टोलीको प्रशिक्षणमा सामेल हुने प्रशिक्षक कोम्यानले बताएका छन् ।