एजेन्सी – सुपरस्टार लियोनल मेस्सीले बार्सिलोना छाड्ने विषयमा क्लबसँग कुनै सहमति बनिसकेको छैन । तर मेस्सी आफू भने जसरि पनि क्लब छाड्ने पक्षमा रहेका छन् ।

मेस्सी र बार्सिलोनाबीच छलफल समेत नभइरहेको अवस्थामा ला लिगाले भने उनले क्लब छाड्दाको अवस्थामा ७ सय मिलियनको रिलिज क्लज लागु हुने ठहर गरिसकेको छ । मेस्सी आफैंले आफ्नो सम्झौताको प्रावधान अनुसार अन्तिम सिजनमा रिलिज क्लज नरहने इंगित गर्दै आफ्नो सम्झौता रद्द गर्न क्लबसमक्ष आग्रहसहित पत्र लेखेका थिए । तर क्लबले त्यसलाई स्वीकार गरेको छैन ।

मेस्सीले पत्रमार्फत नै क्लबलाई आग्रह गरेपछि त्यसलाई लिएर अनेक ढंगले चर्चा भइरहेका छ । क्लब अध्यक्ष जोसेप मारिया बार्टोमेउसँग असन्तुष्ट रहेका मेस्सीलाई क्लबले पुन: छलफल गर्न दुई विकल्प दिएको छ । या त सम्झौता नविकरण गर्ने अथवा रिलिज क्लज बराबर रकम तिरेर अन्यत्र क्लबमा भविष्य रोज्ने ।

मेस्सी भने नयाँ प्रशिक्षक रोनाल्ड कोम्यानसँग छलफलपछि अब क्लब छाड्नेमा विश्वस्त छन् । अब मेस्सी र बार्सिलोनाबीच तगारो भनेको मात्र उनको ट्रान्सफर कसरि हुन्छ भन्ने रहेको छ । बार्सिलोनाले मेस्सीलाई फ्री ट्रान्सफरका लागि फुकुवा नगर्ने प्रष्ट पारिसकेको छ । अन्य क्लबसँग रिलिज क्लजभन्दा कम रकममा सहमति गर्ने विकल्प भने अझैपनि क्लबसँग छ । तर अहिलेको अवस्थामा क्लबले त्यसतर्फ ध्यान दिएको छैन ।

यता मेस्सीले बार्सिलोना छाडेपछि म्यानचेस्टर सिटी जाने मनसाय भने बनाइसकेका छन् । पेप गुआर्डीओलासँग निकटको सम्बन्ध रहेका मेस्सी आफ्ना नजिकका साथी सर्जियो अगुएरोसँग सिटीबाट खेल्नेमा सकारात्मक देखिएकचन । त्यसैले मेस्सीका लागि ठूलो रकम खर्च गर्न तयार सिटीले विशाल सम्झौता गर्ने तयारी गरेको छ ।

सिटीले मेस्सीसँग ५ वर्षको सम्झौता गर्न चाहिरहेको बताइएको छ । सञ्चारमाध्यमका अनुसार सम्झौता दुई खाले हुनेछ, जसमा पहिलो ३ वर्ष प्रिमियर लिगको सिटीमा र त्यसपछिको अन्तिम दुई वर्ष सिटीको भगिनी सम्बन्ध रहेको एमएलएसको न्यूयोर्क सिटीबाट खेल्ने विकल्प हुनेछ ।

मेस्सी हाल ३३ वर्ष भएकाले पनि उमेरसँगै उनी प्रिमियर लिगमा लामो समय खेल्ने सम्भावना कम रहन्छ । त्यसैले मेस्सीलाई ३३ वर्षको उमेरमा ५ वर्षको सम्झौतासँगै करिअरको अन्त्य एमएलएसमा गर्न विकल्प दिने सिटीको योजना छ । एमएलएस गएपनि आर्थिक रुपमा भने मेस्सीलाई असर पर्ने देखिन्न ।

सिटीले मेस्सीलाई हाल बार्सिलोनामै आर्जन गरेबराबर वार्षिक १ सय मिलियन युरो दिने प्रस्ताव अगाडी सारेको छ । बोनससहित उनले ५ वर्षमा उनले ७ सय ५० मिलियन युरो कमाउनेछन् । सिटीले यूईएफएको आर्थिक नियमावलीलाई ध्यानमा राख्दै उनलाई २ सय ५० मिलियन युरो बोनस स्वरुप दिने तयारी गरेको छ ।

सिटीले मेस्सीका लागि १ सय मिलियन युरोसहित बर्नार्डाे सिल्भा, ग्याब्रियल जेसस र इरिक गार्सिया दिने प्रस्तावको तयारी गरिरहेको छ । यी तीन खेलाडीको बजार मूल्य २ सय मिलियन युरो बराबर रहेको छ । यी तीनै खेलाडी बार्सिलोनाको शैली र आवश्यकता अनुसार टोलीमा फिट रहने भएकाले पनि सिटीले यस्तो प्रस्तावको तयारी गरेक हो । बार्सिलोना टोली पूनर्निर्माण गर्न कस्सिएको अवस्थामा यी तीन खेलाडी कोम्यानको रोजाइमा पर्न सक्छन् ।

मेस्सीले सिटीको शर्तहरु स्वीकार गरे प्रशिक्षक पेप ग्वार्डिओला र मेस्सीको पुनर्मिलन हुनेछ । ग्वार्डिओलाले बार्सिलोनामा मेस्सीलाई २००८ देखि २०१२ सम्म प्रशिक्षण दिएका थिए । त्यसबेला मेस्सीले आफ्नो खेलमा व्यापक सुधार गर्दै टोलीका साथै व्यक्तिगत सफलता हासिल गरेका थिए ।

स्पोर्ट्स मेलको अनुसार प्रशिक्षक पेप र मेस्सी इतिहाद सर्ने विषयमा यसअघि नै छलफलमा थिए । करिव २० वर्ष स्पेनमा रहेका मेस्सीले भाषाको विषयमा पनि छलफल भएको उल्लेख गरिएको छ । मेस्सीले पेपसँग छलफलपछि नै बार्सिलोना समक्ष आग्रह पत्र पठाएको बुझिएको छ ।

सिटीले प्रस्ताव गरेका मध्यका बर्नार्डो सिल्भा कोम्यानको शैलीसँग मिल्दो खेलाडी हुन् । सिटीले मेस्सी आउने खण्डमा सिल्भालाई बार्सिलोना पठाउन आनाकानी गर्ने छैन । यता बार्सिलोनालाई पनि सिल्भाको आगमनले दिर्घकालिन समाधान हुने देखिन्छ ।

रिपोर्टअनुसार बार्सिलोना पनि जेससलाई अनुबन्ध गर्ने योजनामा रहेको बुझिएको छ । जेसस बार्सिलोनाको मुख्य प्राथमिकतामा रहेका छन् । उनलाई लुइस सुआरेजको विकल्पमा अघि सारिएको छ । जेससको अनुबन्ध अब मेस्सीको प्याकेजमै समावेश हुन सक्छ ‌।

अर्काे समरसम्म सम्झौता रहेका गार्सिया पनि ग्वार्डिओलाको योजनामा रहेका छैनन् । गार्सिया यसअघि बार्सिलोनाकै एकेडेमीबाट सिटी आएका थिए । उनले सिटीसँग सम्झौता नविकरण नगरेर अर्को सिजन बार्सिलोना फर्कने मनस्थिति बनाएका थिए ।

सामाजिक संजाल इन्स्टाग्राममा मेस्सीले हाल ४ क्लबलाई मात्र फलो गर्दै आएका छन् । त्यसमा हालको क्लब बार्सिलोना र बाल्यकालको क्लब नेवेल्स ओल्ड ब्वाइजसंगै म्यानचेस्टर सिटी र चेल्सी रहेको छ । स्रोतका अनुसार मेस्सीले पछिल्लो केहि दिनमा चेल्सी र सिटीलाई फलो गर्न थालेका हुन् ।

गत बुधबार इन्स्टाग्राममा नै फरवार्ड सर्जियो अगुएरोले मेस्सी सिटी आउने संकेत गरेका छन् । यसअघि ‘सर्जियो अगुएरो १०’ युजरनेम राखेका अगुएरोले आफ्नो नामबाट ‘१०’ नम्बर हटाएर ‘सर्जियो अगुएरो’ मात्र राखेका छन् । यसले पनि अगुएरोले मेस्सीलाई १० नम्बर जर्सी दिन खोजेको बुझिएको छ ।