एजेन्सी – ब्राजिलियन स्टार फरवार्ड नेयमारले आफु थप एक सिजन फ्रेन्च क्लब पेरिस सेन्ट जर्मेन (पीएसजी) मै बस्ने बताएका छन् । पीएसजीको म्यागेजिनसँगको अन्तर्वार्तामा २८ वर्षीय नेयमारले आफु थप एक सिजन पीएसजीमै रहने बताएका हुन् ।

कोरोना महामारीअघि नेयमार आफ्नो पुर्व क्लब बार्सिलोना फर्कने चर्चा चलेको थियो । तर, बार्सिलोनाको पछिल्लो बिकसित घट्नाक्रमका कारण पनि नेयमारले थप एक सिजन पेरिसमै बस्ने रहने निर्णय गरेको बुझिएको छ । नेयमारले क्लबको इतिहासको पानामा आफ्नो नाम लेखाएर मात्र क्लब छाड्ने समेत बताएका छन् ।

‘म अर्को सिजन पीएसजीमा बस्नेछु । च्याम्पियन्स लिगको फाइनल पुग्ने र जित्ने लक्ष्य छ,’ नेयमारले भने, ‘क्लबको इतिहासको पुस्तकमा नाम राख्न मन छ । क्लबको लेजेन्ड बन्नेछु ।’ उनले पछिल्लो समय पीएसजीमा उत्कृष्ट प्रदर्शन गरिरहेका छन् ।

नेयमार सन् २०१७ मा विश्व कीर्तिमानी १९८ मिलियन पाउन्डमा बार्सिलोनाबाट पीएसजी आएका थिए । पछिल्लो समय भने नेयमारले आफु पेरिसमा खुसी रहेको बताउँदै उत्कृष्ट प्रदर्शन समेत गरिरहेका छन् । उनको अर्का फरवार्ड किलीयन एमबाप्पेसँग पनि सम्बन्ध र तालमेल उत्कृष्ट छ ।

पीएसजी यसै सिजन सकिएको च्याम्पियन्स लिगमा क्लबको इतिहासमा पहिलोपट फाइनलमा प्रवेश गरेपनि जर्मन क्लब बायर्न म्युनिखसँग १–० ले पराजित हुँदै उपाधि जित्नबाट बञ्चित बनेको थियो । यसअघिका सिजन नेयमार घाइते हुँदा पीएसजी सेमिफाइनल नपुग्दै च्याम्पियन्स लिगबाट बाहिरिंदै आएको थियो ।

सन् २०१३ मा ब्राजिली क्लब सान्तोसबाट बार्सिलोना आएर चार वर्ष बार्सिलोनामा रहदा नेयमारले २ ला लिगा, एक च्याम्पियन्स लिग, तीन कोपा डेल रे र एक फिफा क्लब विश्वकप जितेका थिए । यस्तै नेयमारले पीएजसीबाट तीन सिजन लिग वान, समान दुई पटक कप डि फ्रान्स र कप डि लिग तथा एकपटक ट्रफी डेस च्याम्पियन्स जितेका छन् ।