एजेन्सी – रियल सोसिडाडका मिडफिल्डर डेविड सिल्भालाई कोरोना भाइरस कोभिड १९ संक्रमण भएको पुष्टी भएको छ ।

म्यानचेस्टर सिटीबाट केहि समय अघि सोसिडाड पुगेका सिल्भालाई सोमबार सार्वजनिक गर्ने कार्यक्रम थियो । तर, सोमबार बिहान उनलाई कोरोना संक्रमण भएको पुष्टी भएपछि सार्वजनिक गर्ने कार्यक्रम स्थगित भएको थियो ।

शुक्रबार भएको परिक्षणमा भने सिल्भाको पिसिआर परिक्षण नेगेटिभ आएको बताइएको थियो । अब सिल्भालाई प्रशिक्षणमा सामेल गराउनका लागि सोसिडाडले केहि समय कुर्नुपर्ने भएको छ ।
सोसिडाडसँग २ वर्षको सम्झौता गर्दै सिल्भा १० वर्षपछि स्पेनिस क्लबमा फर्किएका थिए । ३४ वर्षे सिल्भा सन् २०१० मा स्पेनिस क्लब भ्यालेन्सियाबाट इंग्लिस क्लब म्यानचेस्टर सिटी पुगेका थिए ।

भ्यालेन्सियाबाट सिटी पुगेपछि उनले सिटीमै १० वर्ष बिताए । सिटीका लेजेन्ड सिल्भालाई इटालियन क्लब लाजियोले ३ वर्षको सम्झौता प्रस्ताव गरेपनि सोसिडाड अनुबन्ध गर्न सफल भएको हो ।
सिल्भाले सिटीबाट ४ सय ३६ खेल खेल्दै विभिन्न १४ उपाधि जिताउन महत्वपुर्ण भुमिका निभाए ।

उनले प्रिमियर लिगमा ३०९ खेल खेल्दै ६० गोल गरेका थिए । सिटी २०१२, २०१४, २०१८ र २०१९ को प्रिमियर लिग उनी टोलीका महत्त्वपूर्ण सदस्य थिए । त्यस्तै सिल्भाले सिटीबाट २ एफए कप, ५ लिग कप र ३ कम्युनिटी सिल्ड जितेका थिए । सिल्भा स्पेनले २०१० मा विश्वकप तथा २००८ र २०१२ को युरोकप जित्दा टोलीका सदस्य थिए ।