एजेन्सी – बार्सिलोनाका उरुग्वेली फरवार्ड लुइस सुआरेजलाई इटालियन च्याम्पियन युभेन्टसले अनुबन्धको प्रयास गर्ने भएको छ ।

अर्जेन्टिनी फरवार्ड गोन्जालो हिगुएनले युभेन्ट्स छाडेपछि टोली अर्को स्ट्राइकरको खोजीमा रहेको छ । त्यसका बार्सिलोनाका लुइस स्वाआरेजलाई भित्राउने गरि युभेन्ट्सले प्रयास थालेको छ । उरुग्वेली फरवार्ड सुआरेज बार्सिलोनाका नयाँ प्रशिक्षक रोनाल्ड कोम्यानको योजनामा नरहने प्रष्ट भएपछि गन्तव्यको खोजीमा छन् ।

ला गजेटा डेलो स्पोर्टसका अनुसार स्वाआरेजका प्रतिनिधि र युभेन्ट्सबीच दुई पटक सम्म छलफल भइरहेको छ । बार्सिलोनामा ६ वर्ष बिताएका सुआरेजलाई भित्राउनका लागि युभेन्ट्सका उपाध्यक्ष पाभेल नेदभेदले दुई पटक सम्म छलफल गरिसकेको बताइएको छ ।

बार्सिलोनामा जस्तै युभेन्ट्समा पनि सुआरेजलाई बार्षिक रुपमा १० मिलियन युरो पारिश्रमिक दिने सहमति बनेको विश्वास गरिएको छ । इटालीको कर प्रणालीका कारण युभेन्ट्सले थप ५ मिलियन युरो दिने बताइएको छ ।

युभेन्ट्सले रोमाका इडेन जेकोलाई पनि लिने प्रयास गरेको थियो । बोसनियाका जेकाका लागि युभेन्ट्सले झन्डै १० मिलियन युरो सरुवा रकम दिनुपर्नेछ । तर, सुआरेज भने फ्रि ट्रान्सफरमा रहने सम्भावना छ । सम्झौताको अन्तिम वर्षमा रहेका सुआरेजलाई बार्सिलोनाले बिनासर्ट फुकुवा गर्न खोजेको थियो ।

युभेन्टसको प्रशिक्षक आन्द्रीए पिर्लोले आफ्नो पहिलो पत्रकार सम्मेलनमा नै हिगुआइनले क्लब छाड्ने र अर्का अर्जेन्टिनी फरवार्ड पाउलो डिबाला क्लबमै रहेको स्पष्ट पारेका थिए । पिर्लोले हिगुआइनसँग व्यक्तिगत रुपमा भेटेर नै आफ्नो निर्णयबारे जानकारी दिएको बताएका हुन् ।

‘उनी च्याम्पियन र महान् खेलाडी हुन् । तर, यहाँ उनको समय सकिएको छ । हामीले एक अर्काबीच छलफल गर्‍यौ र निर्णय लियौं । म उनलाई धेरै सम्मान गर्छु । तर, हामीले अलग हुने निर्णय लिएका छौ,’ पिर्लाेले पत्रकार सम्मेलनमा भने ।

युभेन्ट्सका तेस्रा महँगा खेलाडी हिगुआइन २०१६ मा इटालियन क्लब नेपोलीबाट ७५ मिलियन पाउन्डमा युभेन्टस पुगेका थिए । स्पेनिस क्लब रियल म्याड्रिडका पुर्व खेलाडी समेत रहेका हिगुआइनले लोनमा इंग्लिस क्लब चेल्सी र इटालियन क्लब एसी मिलानबाट समेत खेलिसकेका छन् । हिगुआइनले युभेन्ट्सका लागि १ सय ४९ खेलमा ६६ गोल गरेका छन् ।

पिर्लोले डिबालालाई सुपरस्टार फरवार्ड क्रिस्टियानो रोनाल्डोको पार्टनरको रुपमा राख्न चाहेका छन् । ‘ड्याबाला बजारमा उपलब्ध हुने छैनन् । उनी मेरो लागि महत्वपूर्ण खेलाडी हुन् । उनी जति सक्दो चाँडो फर्कनेछन् । उनी क्लबको योजनाको अंश हुन्,’ पिर्लोले भने ।

पिर्लोले आफू सहि समयमा क्लबको प्रशिक्षक बनेको समेत जनाएका छन् । ‘मैले निर्णय लिनुअघि सोच्ने समय पाइन । सबै यति चाडो भयो की मैले हुन्छ भनिहालें । मैले यो निर्णय गर्नुको कारण म आफूलाई यो ठाउँमा ठिक देखेर हो.’ उनले भने ।

खेलाडीको रुपमा युभेन्टसका लागि ४ पटक लिग जितेका पिर्लो जुलाईको अन्त्यमा यू-२३ टोलीको प्रशिक्षकमा नियुक्त भएका थिए । तर त्यसको एक साता नबित्दै उनलाई सिनियर टोलीको जिम्मेवारी दिइयो । च्याम्पियन्स लिगमा लियोनसँग पराजित भएपछि क्लबले माउरिजियो सार्रीलाई निकालेको थियो ।