एजेन्सी – जिनेदिन जिदानले रियल म्याड्रिडको पूर्न संरचना अहिलेका लागि रोकेका छन् । कोरोना भाइरसको कारण उत्पन्न कठिन परिस्थितिका कारण आउने सिजनका लागि कुनै पनि महत्त्वपूर्ण सम्झौता नहुने बताइएको छ ।

जिदानले लोनमा गएका मार्टिन ओडेगार्ड र एन्ड्रि लुनिनलाई भने क्लबमा फर्काउने छन् । नयाँ सम्झौता नगर्दा टोलीलाई त्यसको असर पर्न सक्नेछ । तर, जिदानले नेतृत्व गर्दा कम लगानीमा पनि सफलता प्राप्त गराएका छन् । फ्रान्सेली प्रशिक्षकको नेतृत्वमा रियलले सम्भव ११ उपाधि मध्ये ८ उपाधि जितेको थियो ।

त्यसअवधिमा रियलले खेलाडीका लागि ७० मिलयन युरो खर्च गरेको थियो । सन् २०१६ मा च्याम्पियन्स लिग जित्दा सम्म जिदानले आफैं रकम नै खर्च गरेका थिएनन् । उनले पहिलो सम्झौताका रुपमा लगत्तै सिजनमा ३० मिलियन युरो खर्चेर अल्भारो मोराटा भित्राएका थिए ।

इस्पान्योलमा लोनमा रहेका मार्को एसेन्सियोलाई जिदानले २०१६ को समरमा रियलको पहिलो टोलीमा फर्काएका थिए । त्यस्तै मारियानो डिजलाई जुनियरबाट सिनियर टोलीमा डाकिएको थियो । २०१६-१७ मा जिदानको नेतृत्वमा रियलले सुपरकोपा डि स्पाना, क्लब विश्वकप, ला लिगा र च्याम्पियन्स लिग जितेको थियो । २०१७ को समरमा रियलले ४० मिलियन युरोमा थियो हर्नान्डेज र डानी केबासोललाई भित्राएको थियो ।

जिसस भालेजो, बोर्जा मायोरल, मार्कोस लोरेन्टेले लोनबाट फर्केर पहिलो टोलीमा मौका पाएका थिए । अक्रफ हाकिमी र लुका जिदान पनि सिनियर टोलीमा बढुवा भएका थिए । अर्को एक वर्षमा रियलले सुपरकोपा डि स्पाना, क्लब विश्व कप र च्याम्पियन्स लिग जितेको थियो । दुई सिजनमा उनले ८ वटा उपाधि जितेका थिए । त्यति बेला सम्म उनले ७० मिलियन युरो खर्च गरेका थिए ।

जिदान सन् २०१९ मा फेरि फर्केर रियलमा पुगेका थिए । उनी फर्कनुअघि टोलीले इडेर मिलिसाओ, रोड्रिगो गोएस र इडन हाजार्डलाई भित्राएको थियो । दोस्रो पटक प्रशिक्षक बनेपछि जिदानले फर्ल्यान्ड मेन्डी र लुका जोभिचका लागि १ सय मिलियन खर्च गरेका थिए । पछिल्लो पटक रियलले सुपर डि स्पाना र ला लिगा जितेको थियो ।

रियलले यो सिजन भने नयाँ खेलाडी भित्राउने सम्भावना छैन । अहिलेकै टोलीबाट रियलले फेरि पनि कस्तो सफलता प्राप्त गर्नेछ त्यो भने हेर्न उत्सुकता रहनेछ ।