एजेन्सी – जर्मनी राष्ट्रिय फुटबल टोली तथा जर्मन क्लब बायर लिभरकुसनका युवा मिडफिल्डर काई हाभर्टज इंग्लिस क्लब चेल्सीमा अनुबन्धित भएका छन् ।

लन्डन क्लब चेल्सीले हाभर्टजलाई ७१ मिलियन पाउन्डमा शुक्रबार राति ५ वर्षको लागि अनुबन्धित गरेको हो । बोनस र प्रदर्शनका आधारमा थप २० मिलियनसम्म तिर्नुपर्ने हुन्छ । जर्मनीको राष्ट्रिय टोलीमा रहेका २१ वर्षे मिडफिल्डर शुक्रबार नै चेल्सीसँगको सम्झौताको लागि लन्डन आएका थिए ।

नयाँ सिजनको लागि चेल्सीले अनुबन्ध गरेको हाभर्टजलाई सातौं खेलाडी हुन् । चेल्सीले यसअघि हाकिम जियाच, टिमो वेर्नर, जाभिएर मुयाम्बा, मालाङ सार, थियागो सिल्भा र बेन चिलवेललाई अनुबन्ध गरिसकेको छ । यसक्रममा चेल्सीले २०० मिलियन भन्दा बढी खर्च गरिसकेको छ ।

यससँगै हाभर्टज जर्मनीबाट प्रिमियर लिगमा अनुबन्ध हुने सर्वाधिक महँगा खेलाडी बनेका छन् । यस्तै उनी चेल्सीका समेत सबैभन्दा महँगा खेलाडी बनेका छन् । यसअघि चेल्सीले गोलरक्षक किपा अरिजाबालागालाई ७१ मिलियन नै खर्चिएको थियो । पछिल्लो समय खस्कँदो प्रदर्शनका कारण चेल्सीले उनलाई रिलिज गर्ने योजना बनाएको छ ।

हाभर्टज चेल्सीमा अनुबन्ध भएसँगै उनी बेलायती क्लबले अनुबन्ध गरेको दोस्रो सर्वाधिक महँगो खेलाडी बनेका छन् । यसअघि २०१६ मा म्यानचेस्टर युनाइटेडले पल पोग्वालाई अनुबन्ध गर्दा मोटो रकम खिर्चएको थियो । प्रिमियर लिगबाट महँगो मुल्यमा बाहिरिने खेलाडीमा लिभरपुलका फिलिपे कौटिन्हो छन् । लिभरपुलले कौटिन्होलाई २०१८ मा क्याटलान क्लब बार्सिलोनामा १४५ मिलियन पाउन्डमा बेचेको थियो ।

चेल्सीमा अनुबन्ध भएसँगै हाभर्टजले यहाँ आउन पाउदा खुशी र गर्व लागेको बताएका छन् । ‘म यहाँ हुदा धेरै खुसी छु । गर्व गर्छु । मेरो लागि चेल्सी जस्तो ठुलो क्लबबाट खेल्नु सपना साकार भएको छ,’ हाभर्टजले भने, ‘म यहाँ खेलाडी र प्रशिक्षकलाई कुर्न सक्दिन । म यहाँ हुन पाउदा धेरै खुशी छु ।’

चेल्सीकी डाइरेक्टर मरिना ग्रानोभास्कियाले चेल्सीको यो अविश्वनीय ट्रान्सफरमा हाभर्टज पनि मुख्य रहेको बताएकी छिन् । उनले हाभर्टज आफ्नो उमेरको उत्कृष्ट खेलाडी रहेको र उनलाई टिममा ल्याउन पाउँदा निकै उत्साहित भएको बताइन् ।

यसअघि दुई ट्रान्सफरमा खेलाडी अनुबन्ध गर्न नपाएको चेल्सीले यो सिजन खुलेरै खेलाडी अनुबन्धमा मोटो रकम खर्चदै प्रिमियर लिग जित्ने लक्ष्य राखेको छ ।

हाभर्टजले बुन्डेसलिगा क्लब बायर लिभरकुुसनका लागि चार सिजनमा १५० खेलमा ४६ गोल र ४५ असिस्ट दिएका छन् । उनले जर्मनीबाट ७ खेल खेल्दै १ अन्तर्राष्ट्रिय गोल गरेका छन् ।