एजेन्सी – युईएफए नेसन्स लिग अन्तर्गत शनिबार राति आइसल्यान्ड र इंग्ल्यान्डबीचको खेल आइसल्यान्डको मैदानमा नेपाली समयअनुसार राति ९ः४५ बजे पछि सुरु हुनेछ ।

यि दुई टोली दोस्रोपटक भिड्न लागेका हुन् । सन् २०१६ को युरोकपको क्वाटरफाइनलमा आइसल्यान्डले २–१ को जित निकाल्दै सनसनी मच्चाएको थियो । आइसल्यान्ड घरेलु मैदानमा इंग्ल्यान्डलाई पुनः स्तब्ध पार्दै सुखद सुरुवात गर्ने लक्ष्यमा हुनेछ । फिफा वरीयतामा ३९औं स्थानमा रहेको आइसल्यान्ड पछिल्लो ६ खेलमा अपराजित रहेको छ । आइसल्यान्ड अपराजित यात्रालाई निरन्तरता दिने दाउमा हुनेछ ।

यता, इंग्ल्यान्ड घरेलु टोलीलाई पराजित गर्दै नेसन्स लिगमा सुखद सुरुवात गर्ने योजनामा हुनेछ । कोरोना संक्रमणका कारण केही स्टार खेलाडीले राष्ट्रिय टोलीबाट बाहिरिनु परेपछि इंग्ल्यान्डसँग युवा खेलाडीहरुको बाहुल्यता छ । ह्यारी केन, जाडोन सान्चो, मेसन ग्रीनवुड, फिल फोडेन, रहिम स्टर्लिङ, काइल वाल्कर र ट्रेन्ट अलेक्सान्डर अर्नाेल्डजस्ता खेलाडीहरु इंग्ल्यान्डसँग छ ।

इंग्ल्यान्ड पछिल्लो ६ मध्ये ५ खेलमा अपराजित छ । गत अक्टोवरमा भएको युरो छनोटमा चेक रिपब्लिकसँग २–१ ले पराजित भएयता इंग्ल्यान्ड पछिल्लो ३ खेलमा अपराजित छ । इंग्ल्यान्ड चार वर्षअघि भोगेको हारको बदला लिने योजनामा हुनेछ ।

अन्य खेल

‘सी’ – २ : नर्थ म्यासेडोनियाविरुद्ध अर्मेनिया (राति ६ः४५ बजे), इस्टोनियाविरुद्ध जर्जिया (राति ९ः४५ बजे)

‘डी’ – २ : जिब्राल्टारविरुद्ध सान मारिनो (राति ६ः४५ बजे)

‘ए’ –२ : आइसल्यान्डविरुद्ध इंग्ल्यान्ड (राति ९ः४५ बजे), डेनमार्कविरुद्ध बेल्जियम (राति १२ः३० बजे)

‘सी’ १ : अजरवैजानविरुद्ध लक्जेमवर्ग (राति ९ः४५ बजे), साइप्रसपिरुद्ध मोन्टेनेग्रो (राति ९ः४५ बजे)

‘ए’ ३ : पोर्चुगलविरुद्ध क्रोएसिया (राति १२ः३० बजे), स्वीडेनविरुद्ध फ्रान्स (राति १२ः३० बजे)