एजेन्सी – इंग्लिस प्रिमियर लिग क्लब एभर्टनले ब्राजिल तथा इटालियन क्लब नेपोलीका मिडफिल्डर एलानलाई अनुबन्ध गरेको छ । एभर्टनले एलानलाई ३ वर्षको लागि २२ मिलियन पाउण्डमा अनुबन्ध गरेको हो ।

एलान यो सिजनको एभर्टनको पहिलो अनुबन्धन हो । नेपोलीका पुर्व प्रशिक्षक रहेका कार्लाे एन्सेलोटीको पहलमा एलान एभर्टन आउन राजी भएका हुन् । एन्सेलोटी नेपोलीको प्रशिक्षक रहँदा एलानले ६१ खेल खेलेका थिए । एलानले प्रशिक्षक एन्सेलोटीले नै गुडिसन पार्कमा ल्याउन सम्भव सबै गरेको बताएका छन् ।

‘एभर्टनको लागि हस्ताक्षर गर्नु साँच्चिकै खुसीको कुरा हो । म यहाँ आउन पाउदा अत्यन्तै खुशी छु ।’ एभर्टनमा सम्झौता पछि २९ वर्षे एलानले भने, ‘मलाई आशा छ । मैले आफ्नो सम्पुर्ण करियरमा गरेको जस्तै टिमका सहयात्रीसँग मिलेर एभर्टनमा आफ्नो प्रदर्शनलाई थप चुस्त बनाउनेछु । मैले केही उत्कृष्ट खेल, उत्कृष्ट प्रदर्शन र केही महत्वपुर्ण उपाधिहरु जितेको छु । यो प्रिमियर लिगको इतिहास बोकेको क्लब हो । यसको आफ्नै छुट्टै इतिहास छ । विशेषगरी यहाँ एन्सेलोटी प्रशिक्षक हुनुहुन्छ । जसका कारण तपाईले एभर्टन आउनेबारेमा दुईपटक सोच्नुहुन्न ।’

२९ वर्षीय मिडफिल्डरले आठ वर्ष इटली बसाई टुंग्याएर इंग्ल्यान्ड आएका हुन् । एलान २०१२ मा ब्राजिली क्लब भास्को डा गामाबाट सिरी ‘ए’ क्लब उडिनेसी आएका थिए । त्यसपछि उनी २०१५ मा नेपोली पुगेका थिए । उनले नेपोलीको लागि २१२ खेलमा ११ गोल गरेका छन् । एलानले यो सिजन नेपोलीबाट ३३ खेल खेल्दै २ गोल गरेका थिए । उनले ब्राजिलबाट ९ अन्तर्राष्ट्रिय क्याप जितेका छन् ।

एभर्टन प्रिमियर लिग क्लब वाट्फोर्डका एब्डुलाय डोउकोउरे र स्पेनिस क्लब रियल म्याड्रिडबाट हामेस रोड्रिग्वेज अनुबन्ध नजिक छ ।