एजेन्सी – युवा स्टार फरवार्ड केलियन एमबाप्पेको गोलमा विश्व विजेता फ्रान्सले युईएफए नेसन्स लिगमा सुखद शुरुवात गरेको छ । फ्रान्सले नेसन्स लिगको पहिलो खेलमा स्वीडेनलाई १–० ले पराजित गर्दै विजयी शुरुवात गरेको हो ।

फ्रेन्ड्स एरिना सोल्नमा शनिबार राति भएको खेलमा पाहुना टोलीको फ्रान्सको जितमा एमबाप्पेले गरेको एकमात्र गोल नै निर्णायक बन्यो । अन्तिम समयमा फ्रान्सले पेनाल्टी पाएपनि एन्टोइन ग्रिजमनले सदुपयोग गर्न सकेनन् ।

खेलको शुरुवातमा घरेलु टोली स्वीडेनले दवावमा राखेपनि फ्रान्सको रक्षापङ्ति तोड्न सकेन । १४औं मिनेटमा इमिलि फोर्सवर्गको फितलो क्रस एनगोलो कान्टेलाई डिफ्लेक्ट हुदै बाहिरिएको थियो । लगत्तै प्राप्त कर्नरमा पाएरे विङ्सटनले प्रयास गरेपनि पोस्टबाट थोरै बाहिरिदा स्वीडेन अग्रता लिनबाट चुक्यो ।

३८औं मिनेटमा फ्रान्सका कप्तान तथा गोलरक्षक ह्युगो लोरिसले मार्कुस वर्गको क्लोज रेन्जको प्रहारलाई बचाए । रिवाउन्डमा फोर्सवर्गको प्रहारल् पोस्टको दिशा लिन सकेन । ४१औं मिनेटमा फ्रान्सले एमबाप्पेको गोलबाट खेलमा १–० को अग्रता लिन सफल भयो ।

फ्रान्सले खेलमा पाएको पहिलो अवसरलाई नै गोलमा परिणत गर्न सफल भएको हो । एमबाप्पले पेनाल्टी बक्समा बललाई उत्कृष्ट नियन्त्रणमा लिदै दुई डिफेन्डर र गोलरक्षकलाई बिट गर्दै क्लोज रेन्जबाट उत्कृष्ट फिनिस गरेका थिए ।

६३औं मिनेटमा एमबाप्पेको क्रसमा एन्टोइन ग्रिजमनले अवसर पाएपनि उनले भेट्न नसक्दा स्वीडिस डिफेन्डरले क्लियर गरिदिए । ६६औं मिनेटमा सेवास्टियन लार्सनको प्रहारमा लोरिस नै बाधक बन्दा फ्रान्सले अग्रता जोगाइराख सफल भयो । ७६औं मिनेटमा ग्रिजमनले अवसर पाएपनि उनको प्रहार आकासियो ।

८९औं मिनेटमा फोर्सवर्गले खेललाई बराबरी गर्ने सुवर्ण अवसर खेर फाल्यो । उनको उत्कृष्ट प्रहारलाई लोरिसले उत्तिकै राम्रो बचाउ गरेका थिए । त्यसपछि स्वीडनले लगातार दुई आक्रमण बुनेपनि गोल गर्न नसक्दा पराजित हुन बाध्य बन्यो । इन्न्युरी समयको थप गरिएको पहिलो मिनेटमा मार्कुस वर्गले प्रहारलाई राफयल भरानले क्लियर गरिदिए । त्यसपछि जोन गुइडेट्टीको प्रहार पोस्६बाट थोरै बाहिरिएको थियो ।

इन्ज्युरी समयमा फ्रान्सले पेनाल्टी पाएपनि ग्रिजमनले सदुपयोग गर्न सकेन । भिक्टर निल्सन लिन्डेलफले एन्थोनी मार्सियललाई पेनाल्टी बक्समा फल गरेपछि प्राप्त पेनाल्टीमा ग्रिजमनको प्रहार क्रसबारमा लागेर बाहिरियो ।

यही समूहको अर्काे खेलमा पोर्चुगलले क्रोएसियामाथि ४–१ को सानदार जित हात पारेको छ । यससँगै लिग ‘ए’ –३ मा पोर्चुगल ३ अंक जोडेर शीर्षस्थानमा रहेको छ । फ्रान्स ३ अंक जोडेर दोस्रो स्थानमा रहँदा अंकविहीन स्वीडेन र क्रोएसिया तेस्रो र पुछारमा छ ।

अन्य खेल

‘सी’ – २
नर्थ म्यासेडोनियाविरुद्ध अर्मेनिया (२–१)
इस्टोनियाविरुद्ध जर्जिया (०–१)

‘डी’ – २
ज्रिबाल्टारविरुद्ध सान मारिनो (१–०)

‘ए’ –२
आइसल्यान्डविरुद्ध इंग्ल्यान्ड (०–१)
डेनमार्कविरुद्ध बेल्जियम (०–२)
‘सी’ १
अजरवैजानविरुद्ध लक्जेमवर्ग (१–२)
साइप्रसपिरुद्ध मोन्टेनेग्रो (०–२)

‘ए’ ३
पोर्चुगलविरुद्ध क्रोएसिया (४–१)
स्वीडेनविरुद्ध फ्रान्स (०–१)