एजेन्सी – इन्ज्युरी समयमा घरेलु टोलीका बिर्किर बिजारसन पेनाल्टीमा चुक्दा इंग्ल्यान्डले युईएफए नेसन्स लिगमा विजयी सुरुवात गरेको छ । शनिबार राति तनावपुर्ण बनेको खेलमा आइसल्यान्डमाथि १–० को कठिन जित निकालेको हो ।

आइसल्याण्डको मैदानमा भएको खेलमा इंग्ल्यान्डलाई जिताउन रहिम स्टर्लिङले इन्ज्युरी समयमा गरेको गोल नै निर्णायक बन्यो । स्टर्लिङले पेनाल्टीमा निर्णायक गोल गरेका थिए । खेलको इन्ज्युरी समयमा नै घरेलु टोलीले पेनाल्टीमार्फत बराबरी गर्ने अवसर पाएपनि बिर्किर पेनाल्टीमा चुक्दा घरेलु टोली इंग्ल्यान्डसँग पराजित हुन पुग्यो । दुबै टिम १० खेलाडीमा समेटिएर खेलको अन्त्य गरेको थियो ।

७७ प्रतिशत बल पोजेसन राखेपनि इंग्ल्यान्डले गोलको लागि निकै संघर्ष गर्नुपरेको थियो । खेलको तेस्रो मिनेटमा नै कप्तान ह्यारी केनको प्रहारलाई आइसल्यान्डका गोलरक्षक हालिस थोर हाल्डोरसनले सहजै नियन्त्रणमा लिए । सातौ मिनेटमा रहिम स्ट्रलिङको क्रसमा इरिक डायरले मिलाइदिएको बलमा केनले गोल गरेपनि उनी अफसाइड ठहरिए । १७औं मिनेटमा जाडोन सान्चोको पासमा डिक्लन राइसको प्रहारलाई आइसल्यान्डका डिफेन्डरले लाइनबाट क्लियर गरिदिदा इंग्ल्यान्ड अग्रता लिनबाट चुक्यो ।

६२औं मिनेटमा जेम्स वार्ड प्रोसको प्रहारमा डिफेन्डर बाधक बन्यो । ६४औं मिनेटमा काइरन ट्रिपिएरको प्रहार पोस्टबाट थोरै बाहिरियो । ७०औं मिनेटमा इंग्ल्यान्ड १० खेलाडीमा समेटियो । अर्नर इंग्भी ट्राउट्सनमाथि फल गरेपछि केएल वाल्कर दोहोरो पँहेलो कार्ड खादै मैदानबाट बाहिरिए । १० खेलाडीमा समेटिएपनि इंग्ल्यान्डले आइसल्यान्डमाथि लगातार दवाव सिर्जना गरेको थियो ।

८८औं मिनेटमा इंग्ल्यान्डले पेनाल्टीको अवसर प्राप्त गर्दा आइसल्यान्ड पनि १० खेलाडीमा समेटियो । आइसल्याण्डका डिफेन्डर स्भेररिर इंगी इन्गासनले पेनाल्टी बक्समा हातले बल रोकेपछि उनी दोहोरो पँहेललो कार्ड खादै मैदानबाट बाहिरिदा इंग्ल्यान्डले पेनाल्टीको अवसर पाएको थियो । जसमा स्टर्लिङ चुकेनन् । र इंल्यान्डलाई १–० को अग्रता दिलायो ।

तर त्यसको एक मिनेट नबित्दै आइसल्यान्डले पनि पेनाल्टीको अवसर पायो । इंग्ल्यान्डका जोसेप गोमेजले होल्मबेर्ट आरोनलाई आफ्नो डिबक्सभित्र फल गरेपछि आइसल्याण्डले पेनाल्टीको अवसर पाएको थियो । तर, बिर्किर बिजारसनको पेनाल्टी प्रहार बाहिरिदा घरेलु टोली खेल बराबरी गर्न बाट चुक्दै पराजित हुन पुग्यो ।

जितसँगै लिग ‘ए’ समूह २ मा इंग्ल्यान्डले ३ अंक जोडेर दोस्रो स्थानमा रहेको छ । बेल्जियम ३ अंक जोडेर शीर्षस्थानमा छ । अंकविहीन आइसल्यान्ड र डेनमार्क तेस्रो र पुछारमा छ ।