एजेन्सी – इटालियन क्लब युभेन्टस तथा बोस्निया एन्ड हर्जगोभिनाका मिडफिल्डर नयाँ सिजनको लागि क्याटलान क्लब बार्सिलोनामा आएका छन् ।

कोरोना संक्रमणबाट मुक्त हुदै प्यानिच प्राइभेट प्लेनबाट शुक्रबार बार्सिलोना पुगेका हुन् । कोरोना संक्रमण पुष्टि भएसँगै दुई सातासम्म टुरिनमै सेल्फ आइसोलेसनमा रहँदा ३० वर्षीय प्यानिच बार्सिलोना आउन ढिलाई भएको थियो ।

उनले बार्सिलोनाको प्रशिक्षण जोडिनुअघि ला लिगाको नियअनुसार अनिवार्य पिसिआर टेष्ट गराउनुपर्नेछ । प्रोटोकल अनुसार दोस्रोपटक पिसिआर टेष्ट गर्नुअघिसम्म उनले एक्लै प्रशिक्षण गर्नुपर्नेछ । स्टार लिओनल मेसी, फिलिप कौटिन्हो पनि पूर्ण प्रशिक्षणमा सामेल हुनुअघि एकल प्रशिक्षणमा सहभागी रहेका थिए ।

क्याटलान क्लबले प्यानिचलाई अर्को हप्ता प्रस्तुत गर्ने जनाएको छ । प्यानिचले बार्सिलोना आउनु नै आफ्नो सपना पुरा भएको बताएका थिए । क्याटलान क्लब बार्सिलोनाले २९ जुन २०२० मा प्यानिचलाई क्लबका मिडफिल्डर आर्थर मेलोलाई युभेन्टस पठाउँदै बेग्लाबेग्लै सम्झौता गरेको थियो ।

आर्थरले पनि युभेन्टसमा प्रशिक्षण सुरु गरिसकेका छन् । युभेन्टसका नयाँ प्रशिक्षक आन्द्रीए पिर्लोको नेतृत्वमा युभेन्टसले अर्को सिजनको लागि टोली निर्माण पनि सुरु गरिसकेको छ । यसक्रममा मिडफिल्डर ब्लेस माटुइडी र गोन्जालो हिगुआइनले क्लब छाड्दा अमेरिकी मिडफिल्डर वेस्टन मक्केनी टुरीन आएका छन् ।