एजेन्सी – फरवार्ड मोहमद सलाहले ह्याट्रिक गरेपछि च्याम्पियन लिभरपुलले इंग्लिस प्रिमियर लिगको पहिलो खेलमा लिड्स युनाइटेडलाई ४-३ ले पराजित गरेको छ ।

आक्रामक रणनीतिका साथ उत्रिएका दुई टोलीबीच खेलको पहिलो हाफमा नै ५ गोल सम्भव भएको थियो । प्रिमियर लिगमा १६ वर्षपछि पुनरागमन गरेको लिड्सका लागि सुरुवात भने राम्रो हुन सकेन । तेस्रो मिनेटमा नै लिभरपुलका मोहमद सलाहको प्रहार डिफेन्डर रोबिन कक्को हातमा लागेपछि रेफ्रीले पेनाल्टी दिए । सलाहले सहजै पेनाल्टीमा गोल गर्दै च्याम्पियन लिभरपुललाई अघि बढाए ।

गत वर्ष च्याम्पियनसिपको विजेता बन्दै प्रिमियर लिगमा बढुवा भएको लिड्सले १२ औं मिनेटमा नै खेल बराबरीमा ल्यायो । काल्भिन फिलिप्सको लामो पासलाई ज्याक ह्यारिसनले पहिलो टचमा उत्कृष्ट नियन्त्रण गर्दै डिफेन्डर बिट गरे । दोस्रो टचमा पेनाल्टी क्षेत्रतर्फ बल बढाएका उनले तेस्रो टचमा गरेको प्रहार गोलरक्षक एलिसन बेकरले बचाउन सकेनन् ।

लिभरपुलले २० औं मिनेटमा नै अग्रता पुन: स्थापना गर्यो । एन्ड्रयु रोबर्टसनको कर्नरमा भर्जिल भान डाइकको शक्तिशाली हेडर गोलरक्षक इयान मेइलरले बचाउन सकेनन् । तर ३० औं मिनेटमा भान डाइककै गल्तीमा लिड्स खेलमा फर्कियो । डच डिफेन्डरले लामो पासलाई क्लियर गर्न नसक्दा बामफर्डले उक्त बललाई पोस्टको दिशा दिए । बामफर्डको प्रहार गोलरक्षक एलिसनको हातमा लागेपनि उनले स्कोर बराबर हुनबाट रोक्न सकेनन् ।

बराबरी भएको तीन मिनेट नबित्दै लिभरपुलले पुन: अग्रता लियो । मोहमद सलाहले फ्रिकिकमा रिबाउन्ड आएको बललाई पेनाल्टी क्षेत्रभित्र अनमार्क रहेको अवस्थामा उत्कृष्ट नियन्त्रण गर्दै हाफ भलीमा सुन्दर गोल गरे । गोलरक्षक मेइलरले सलाहको टप कर्नरतर्फ गएको प्रहारमा हात पुर्याउन सकेनन् ।

पहिलो हाफमा १ गोलले पछि परेको लिड्सले दोस्रो हाफमा आफ्नो शैली कायम नै राख्यो । लिभरपुलले पनि आक्रामक रणनीतिलाई निरन्तरता दिएपनि पाएको अवसर सदुपयोग गर्न सकेन । जवाफमा ६६ औं मिनेटमा खेल पुन: बराबरीमा पुग्यो । हेल्डर कोस्टाको क्रसलाई म्याटुएज क्लिकले गोलमा परिणत गरे । क्लिकले पहिलो टचमा नियन्त्रण गर्दै प्रहार गरेको भलीलाई एलिसनले बचाउन सकेनन् ।

खेलको ८७ औं मिनेटमा लिभरपुलले चौथोपटक अग्रता लिने अवसर पायो । लिड्सका रोड्रीगो मोरेनोले फाबिन्होलाई पेनाल्टी क्षेत्रभित्र लडाएपछि रेफ्रीले पेनाल्टी दिए । सलाहले ह्याट्रिक पूरा गर्ने क्रममा पेनाल्टीमा गोल गर्दै जित पक्का गरे ।

यसअघि दिनको पहिलो खेलमा आर्सनलले नवप्रवेशी फुलहममाथि उसकै मैदानमा ३–० को जित निकाल्दै सानदार विजयी शुरुवात गरेको थियो । आर्सनलको जितमा एलेसान्द्रे लाकाजेट, ग्याब्रिल र कप्तान पिएरे इमरिक औवामियाङले गोल गरे । विलियनले आर्सनलको तीनै गोलमा महत्त्वपूर्ण भूमिका निर्वाह गरेका थिए । पहिलो हाफमा एक तथा दोस्रो हाफमा दुई गोल सम्भव भएको थियो ।

फुलहमको मैदान क्राभेन कटेजमा शनिबार राति भएको खेलमा आर्सनलले खेलेको आठौं मिनेटमा लाकाजेटको गोलबाट अग्रता लिएको थियो । कप्तान औवामियाङको क्रसलाई ग्रानिट झाकाको लो सटलाई फुलहमका डिफेन्डर टिम रिमले क्लियर गर्ने प्रयास गरेपनि राम्रोसँग क्लियर गर्न सकेनन् । उक्त बललाई विलियनले प्रहार गरेपनि गोलरक्षक मारेक रोडाकले बचाउन नसक्दा रिवाउन्डमा लाकाजेटले पोस्ट नजिकैबाट गोल गर्न सफल भएका थिए ।

२७औं मिनेटमा यसै सिजन चेल्सीबाट आर्सनल पुगेका विलियनको प्रहार पोस्टमा लागेर फर्कदा विलियन डेब्यु गोलबाट तथा आर्सनल अग्रता दोब्बर पार्नबाट चुक्यो । ३७औं मिनेटमा कप्तान औवामियाङको प्रहार फुलहमका गोलरक्षक रोडाकले बचाए । पहिलो हाफमा आर्सनलले १-० को अग्रता लियो ।

४९औं मिनेटमा ग्याब्रिल माघलेसले गोल गर्दै आर्सनलको अग्रता दोब्बर पारे । विलियनको कर्नरमा ग्याब्रिलले आर्सनलका लागि प्रिमियर लिग डेब्युमै गोल गर्न सफल भए । ५६औं मिनेटमा एब्डोउबाकर कामाराको फ्रिकिकलाई लाकाजेट्टीले हेडरमार्फत क्लियर गर्दै बचाएपछि घरेलु टोली फुलहम गोल अन्तर घटाउनबाट चुक्यो ।

लगत्तै ५७औं मिनेटमा कप्तान औवामियाङले गोल गर्दै आर्सनललाई ३–० को अग्रता दिलाए । उनले विलियनकै पासमा गोल गरेका थिए । ७१औं मिनेटमा औवामियाङको क्रसमा लाकाजेटको प्रहारलाई फुलहमका गोलरक्षक रोडाकले उत्कृष्ट बचाउ गर्दै अर्काे गोल टारे । ७७औं मिनेटमा हेक्टर बर्लिनको पासमा औवामियाङको अर्काे प्रहारमा रोडाक नै बाधक बने । त्यसपछि थप गोल निस्कन नसक्दा आर्सनल ३–० ले विजयी हुन सफल भयो ।

अर्को खेलमा क्रिस्टल प्यालेसले साउथह्याम्पटनमाथि १-० को जित निकाल्यो । घरेलु टोली प्यालेसको जितमा विल्फ्रिड जाहाले १३ औं मिनेटमा गरेको गोल नै निर्णायक सावित भयो । जाहाले आन्ड्रोस टाउनसेन्डको क्रसमा पहिलो टचमा गरेको प्रहार गोल भएको थियो ।