एजेन्सी – इंग्लिस च्याम्पियन लिभरपुलका प्रशिक्षक योर्गेन क्लोपले प्रिमियर लिगको नवप्रवेशी क्लब लिड्स युनाइटेडको प्रशंसा गरेका छन् ।

प्रिमियर लिग अन्तर्गत नयाँ सिजनको पहिलो खेलमा लिभरपुलले लिड्समाथि ४-३ को जित दर्ता गरेको थियो । अघिल्लो सिजन दोस्रो श्रेणीको लिग उपाधि जित्दै शीर्ष श्रेणीमा बढुवा भएको लिड्सले लिभरपुललाई कडा प्रतिस्पर्धा दिएको थियो । प्रशिक्षक मार्सेलो बिएल्साको रणनीति र खेल्ने शैलीलाई लिभरपुलका प्रशिक्षक क्लोपले खेलपछि प्रशंसा गरे ।

‘म लिड्सका सबैलाई बधाई दिन चाहन्छु । लिड्स निकै राम्रो टोली हो । म विश्वास गर्न सकिरहेको छैन । म यस सिजन लिड्सका धेरै खेल हेर्छु होला । आज निकै राम्रो विपक्षीविरुद्ध राम्रो खेल भयो । दुवै टोलीले सानदार प्रदर्शन गरे । हेर्नेको लागि पनि खेल गजबको रहयो र मलाई मन पर्यो ।’

‘एकै खेलमा यति धेरै गोल हुनु सामान्य होइन । हामीले डिफेन्समा सुधार गर्ने धेरै ठाउँ देखेका छौं । पहिलो खेलमा यस्तो हुनु नयाँ भने होइन । केहि दिन अघि राष्ट्रिय टोलीका लागि खेलेर आएर पनि यस्तो अवस्था देखिएको हुन सक्छ ।’

‘विपक्षीको प्रदर्शनले नै हामी गल्ति गर्न बाध्य भयौं । हामीले राम्रो खेल्न सक्छौं र हामी राम्रो गर्छौं पनि । आज लिड्सजस्तो राम्रो टोलीसँग खेल मलाई मनपर्यो । हामीले उनीहरुलाई समस्या सिर्जना गर्यौं र अझै गोल गर्न सक्थ्यौं । हामीले सेट पिसको प्रयोग राम्रोसँग गर्यौं र गोल पनि त्यहाँबाट निस्कियो ।’

‘लिड्सले ८० मिनेटसम्म राम्रो खेलेको थियो । अन्तिम १० मिनेटमा भने लिभरपुलले निकै दबाब दियो र टोली गल्ति गर्न पुग्यो । हारका बाबजुद पनि लिड्सले राम्रो संकेत देखाएको छ । लिड्सले आजजस्तो खेलिरहन भने ठूलो टोलीको आवश्यकता पर्छ । लिभरपुलले उत्कृष्ट प्रदर्शन गर्न सकेन किनकि लिड्सले खेल्न दिएन । सामान्यतया लिभरपुलले चाहिं लिड्सजसरि विपक्षी टोलीलाई समस्या दिने गर्थ्यो ।’

यता लिड्सका प्रशिक्षक मार्सेलो बिएल्साले भने नतिजामा कुनै गुनासो गरेनन् । ‘ यो एउटा हार हो । लिभरपुलले हामीलाई कठिन समय दियो । विशेषगरि दोस्रो हाफमा हामीले डिफेन्सबाट आक्रमणसम्म बल लग्न सकेनौं । यो स्तरमा गल्ति गरेपछि गोल खानु नौलो होइन,’ उनले भने ।