एजेन्सी – इंग्लिस प्रिमियर लिगमा आज (आइतबार) राति पहिलो राउन्डको दुई खेलमा प्रतिस्पर्धा हुँदैछ । वेस्ट ब्रुमले घरेलु मैदानमा लेस्टर सिटीको आतिथ्यता गर्दा टोटेनहमले घरेलु मैदानमा एभर्टनसँग प्रतिस्पर्धा गर्दैछ ।

वेस्ट ब्रुम र लेस्टर सिटीबीचको खेल नेपाली समयअनुसार साँझ ६ः४५ बजे तथा टोटेनहम र एभर्टनबीचको खेल राति ९ः१५ बजे टोटेनहम हस्टपुर स्टेडियममा हुनेछ । घरेलु मैदानमा टोटनहम सुखद सुरुवात गर्ने लक्ष्यसहित मैदान उत्रनेछ ।

ह्यारी केनको कप्तानीमा मैदान उत्रने टोटनहममा ह्युङ मिन सन, डेल अली, स्टेभेन बर्गवाइन, मोउसा सिसोको, माट डोहर्टि, इरिक डाएर, बिन डेभिस, सर्ज औरिएर, जियोभानी लो सेल्सो, लुकास मौउरा र गोलरक्षकमा ह्युगो लोरिस छन् ।

यता, एभर्टन पनि अवे मैदानमा टोटेनहममाथि जित निकाल्दै सुखद सुरुवात गर्ने दाउमा हुनेछ । कार्लाे एन्सेलोटीको प्रशिक्षणमा रहेको एभर्टनका लागि भर्खरै स्पनिस क्लब रियल म्याड्रिडबाट अनुबन्ध भएका मिडफिल्डर हामेस रोड्रिग्वेजले खेल्ने सम्भावना छ ।

यसबाहेक एभर्टनसँग इंग्ल्यान्डका पहिलो रोजाईका गोलरक्षक जोर्डन पिकफोर्ड, लुकास डिग्ने, रिचार्लीसन, डोमिनिक काल्भर्ट लेविन, थियो वाल्कट, गिल्फी सिगुर्डसन, एलान, यारी मिना र माइकल किनजस्ता खेलाडी रहेका छन् ।

सन्तुलित टोली रहेको दुई टिमबीचको खेल निकै रोमाञ्चक र प्रतिस्पर्धात्मक हुने अपेक्षा गरिएको छ । गत सिजनको प्रिमियर लिगमा एक खेल टोटेनहमले १–० ले आफ्नो पक्षमा पार्दा अर्काे खेल १–१ गोलको बराबरीमा सकिएको थियो ।

यि दुई टोलीबीचको पछिल्लो २० खेलको नतिजा हेर्दा टोटेनहम नै हावी छ । टोटेनहमले ९ खेल आफ्नो पक्षमा पार्दा एभर्टनले ३ खेल मात्रै जितेको छ । ८ खेल बराबरीमा सकिएको छ । एभर्टले २०१२ को प्रिमियर लिगमा २–१ को जित निकाले यता टोटेनहममाथि जित निकाल्न सकेको छैन ।