एजेन्सी – डोमिनिक काल्भर्ट लेविनको निर्णायक गोलको मदतले इंग्लिस प्रिमियर लिगको पहिलो खेलमा एभर्टनले टोटेनहम हट्स्परलाई १-० ले पराजित गरेको छ ।

टोटेनहमको घरेलु मैदानमा काल्भर्ट लेविनले खेलको ५५ औं मिनेटमा खेलको एकमात्र गोल गरेका थिए । लुकास डीनेको फ्रिकिकमा उनले गरेको हेडर गोलमा परिणत भएको थियो । निकै प्रतिस्पर्धात्मक खेलमा दुवै टोलीले आफ्ना नयाँ खेलाडीलाई डेब्यु दिएका थिए । एभर्टनका लागि ३ खेलाडी पहिलो पटक उत्रँदा टोटेनहमले २ खेलाडीलाई डेब्यु गरायो ।

एभर्टनका लागि मिडफिल्डत्रय हामेस रोड्रीग्वेज, अब्दुलाए डुकुरे र अलानले डेब्यु गरेका थिए । तीनै खेलाडीले प्रभावशाली प्रदर्शन गर्दा टोटेनहमका लागि भने डेब्यु गरेका खेलाडीको प्रदर्शन औसत रहयो । डिफेन्डर म्याट डोहर्टि पूरा समय मैदानमा टिक्न सकेनन् भने मिडफिल्डर पिएर एमिल होएबिएरले मध्यम प्रदर्शन गरे ।

एभर्टनले पहिलो हाफमा तुलनात्मक रुपमा बढी अवसर सिर्जना गरेपनि गोल गर्न सकेन । फरवार्ड रिचारलीसनले पहिलो हाफको मध्यतिर गोलरक्षक समेत बिट गरेको अवस्थामा बललाई खाली पोस्टमाथि प्रहार गर्दा एभर्टन अग्रता लिनबाट चुकेको थियो । हामेसले पनि पोस्टतर्फ गरेको प्रहार बाहिरिएको थियो ।

एभर्टनका गोलरक्षक जोर्डन पिकफर्डले पहिलो हाफमा डेले अली र म्याट डोहर्टिको प्रहार विफल पार्दै खेल गोलरहित बराबरीमा नै राखेका थिए । दोस्रो हाफमा सेटपिसमा गोल निस्केपछि एभर्टनले रक्षात्मक रणनीति अपनायो । कार्लो एन्चेलटिको नेतृत्वमा रहेको एभर्टनले टोटेनहमको आक्रमणलाई विफल पार्दै जित पक्का गर्यो ।

यता जोसे मोउरिन्होको टोटेनहम भने घरेलु मैदानमा हारसँगै सिजनको सुरुवात गर्न बाध्य भयो । टोलीले अब यसै साता युरोपा लिगको प्लेअफमा पनि खेल्ने कार्यक्रम रहेको छ ।