एजेन्सी – वैकल्पिक खेलाडी म्यानुयल भालेहोले दुई गोल गरेपछि स्पेनिस ला लिगामा भ्यालेन्सियाले लेभान्टेलाई पराजित गरेको छ ।

घरेलु मैदानमा भ्यालेन्सियाले खेलमा दुईपटक पछि परेर पनि ४–२ को पूनरागमन जित निकालेको हो । घरेलु मैदानमा आइतबार राति भएको खेलमा भ्यालेन्सियाको जितमा थप दुई गोल ग्याब्रिल पौलिस्टा र म्याक्सिमिलियानो गोमेजले समान एक गोल गरे । लेभान्टेका जोसे लुइस मोरालेसले दुवै गोल गरेपनि हार टार्न सकेन ।

खेलको पहिलो मिनेटमा नै जोसे लुइस मोरालेसले गोल गर्दै लेभान्टेलाई सुरुवाती अग्रता दिलाएका थिए । १२औं मिनेटमा घरेलु टोलीले खेललाई १–१ गोलको बराबरीमा ल्याए । काङ इन लीको कर्नरमा ग्याब्रिल पौलिस्टाले हेडरमार्फत गोल गरेका थिए ।

१७औं मिनेटमा लेभान्टेका गोन्जालो मेलेरोले गोल गरेपनि भिएआरले मान्यता पाएन । ३६औं मिनेटमा जोसेले जर्ज मिरामोनको पासमा गोल गर्दै लेभान्टेलाई खेलमा पुनः २–१ को अग्रता दिलाए । ३९औं मिनेटमा काङ इन लीकै पासमा म्याक्सिमिलियानो गोमेजले गोल गर्दै खेललाई पहिलो हाफमा २–२ गोलको बराबरीमा ल्याए ।

दोस्रो हाफमा सब्सिच्युट खेलाडी म्यानुयल भालेहो चम्किए । ७१औं मिनेटमा काङ इन लीको स्थानमा मैदान छिरेका म्यानुयल भालेहोले ७५औं मिनेटमा गोल गर्दै भ्यालेन्सियालाई ३–२ को अग्रता दिलाए । उनले डेनिस चेरेसेभको पासमा गोल गरेका थिए ।

इन्ज्युरी समयको थप गरिएको चौथो मिनेटमा भालेहोले व्यक्तिगत दोस्रो गोल गर्दै भ्यालेन्सियालाई ४–२ को पूनरागमन जित दिलाए । जितसँगै भ्यालेन्सियाले ३ अंक जोडेको छ । लेभान्टे अंकविहीन छ ।