एजेन्सी – इंग्लिस प्रिमियर लिगमा आज (सोमबार) राति पहिलो राउन्ड अन्तर्गत दुई खेलमा प्रतिस्पर्धा हुँदैछ । यो सिजन खेलाडी अनुबन्धमा मोटो रकम खर्चिएको चेल्सीले ब्राइटनको भ्रमण गर्दा सेफिल्ड युनाइटेड र वल्भ्सबीचको खेल पनि आज राति हुँदैछ ।

सेफिल्ड र वल्भ्सबीचको खेल नेपाली १०ः४५ बजे तथा ब्राइटन र चेल्सीबीच राति १ बजे प्रतिस्पर्धा हुनेछ । हेभीवेट चेल्सी ब्राइटनलाई उसकै मैदानमा पराजित गरेर प्रिमियर लिगमा सुखद सुरुवात गर्ने दाउमा हुनेछ ।

तर, चेल्सीले यस समरमा अनुबन्ध गरेका हाकिम जियाच, थियागो सिल्भा र बेन्जामिन चिलवेलले खेल्ने सम्भावना न्युन छ । टिमो वेर्नर र काइ हाभर्टजले खेल्ने बसिलयो सम्भावना छ । काईले ब्राइटनविरुद्ध खेल्दै प्रिमियर लिगमा डेब्यु गर्ने सम्भावना छ । वेर्नरले यसअघि ब्राइटनविरुद्धको मैत्रीपूर्ण खेलमा गोल गर्दै आफु प्रिमियर लिगको लागि तयार रहेको संकेत दिइसकेका छन् ।

कप्तान सिजर एज्पिलिक्वेटा र फरवार्ड क्रिस्टियन पुलिसिस चोटका कारण खअ‍ेलमा उपस्थित हुनेछैनन् । इमर्सन, रोस बार्कली र ट्याम्मी अब्राहम कोरोना संक्रमणका कराण टोलीमा हुनेछैनन् ।

यि खेलाडी नभएपनि चेल्सीसँग एङ्गोलो कान्टे, जर्गिन्हो, मासन माउन्ट, कलुम हड्सन होडोई, मार्काे एसेन्सियो, एन्टेनियो रुडिगर, कोर्ट जोउमा र गोलरक्षकमा किपा एरिजाबालगा रहनेछन् । उनीहरुलाई टिमो वेर्नर र काई हाभर्टजले साथ दिनेछन् ।

यता, ब्राइटन पनि घरेलु मैदानमा चेल्सीलाई स्तब्ध पार्दै सुखद सुरुवात गर्ने दाँउमा हुनेछ । यसै सिजन च्याम्पियन लिभरपुलबाट अनुबन्ध गरेका एडम लालनाले चेल्सीविरुद्ध खेल्ने सम्भावना छ । तर बलियो चेल्सीलाई रोक्न ब्राइटनलाई हम्मे हम्मे पर्नेछ ।

प्रि–सिजनको मैत्रीपुर्ण खेलमा १–१ गोलको तथा त्यसभन्दा अघि अघिल्लो सिजनको प्रिमियर लिगमा चेलसीलाई १–१ गोलको बराबरीमा रोकेका कारण ब्राइटन उच्च मनोवलका साथ मैदान उत्रनेछ ।
यि दुई टोलीको पछिल्लो ८ भेटमा चेल्सी ५ पटक विजयी भएका छन् ।

ब्राइटनले एक खेल आफ्नो पक्षमा पारेको छ । चेल्सी २०१२ को मैत्रीपुर्ण खेलमा २–१ ले पराजित भएयता ब्राइटनसँग अपराजित छ ।