एजेन्सी – यसै समरमा लन्डन क्लब चेल्सीले अनुबन्ध गरेका डिफेन्डर थियागो सिल्भा, मिडफिल्डर हाकिम जियाच र डिफेन्डर बेन चिलवेलले इंग्लिस प्रिमियर लिगको पहिलो खेल गुमाउने भएका छन् ।

चेल्सीका प्रशिक्षक फ्रान्स लाम्पार्डले यि तीन खेलाडी प्रिमियर लिगको पहिलो खेल नखेल्ने पुष्टि गरेका छन् । चेल्सीले सोमबार राति ब्राइटनसँग खेल्दै नयाँ सिजनको sसुरुवात गर्दैछ । जियाचले प्रि सिजनमा ब्राइटनविरुद्धको खेलमा नै चोट बोकेका थिए । उनी चोटबाट फर्कने प्रयासमा छन् ।

सिल्भा र चिलवेल फिटनेसका कारण र पहिलो खेललाई आराम दिइएको लाम्पार्डले बताएका छन् ।
प्रिमियर लिग जित्ने लक्ष्यसहित चेल्सीले यो सिजन खेलाडी अनुबन्धमा २०० मिलियन पाउन्ड खर्चिसकेको छ ।

अन्य टोलीहरु समर ट्रान्सफर शुरु भइसक्दा शान्त रहँदा चेल्सी खेलाडी अनुबन्धमा आक्रमक देखिएको छ । चेल्सीले काई हाभर्टज, टिमो वेर्नर, हाकिम जियाच, थियागो सिल्भा, मालाङ सार र बेन चिलवेल अनुबन्ध गरिसकेको छ । नयाँ गोलरक्षकको खोजीमा रहेको चेल्सी फ्रान्सेली क्लब रेनिसका गोलरक्षक इडोआर्ड मेन्डी अनुबन्ध नजिक पुगेको छ ।

चेल्सीले लगातार खेलाडी भित्र्याउँदा क्लब छाड्ने संख्या भने त्यसै अनुरुप बढेको छैन । सदाझैं चेल्सीले केहि युवा खेलाडीलाई लोनमा पठाएको छ भने लाम्पार्डको योजनामा नरहेका सिनियर खेलाडी बेच्न क्लबले तयारी गरेको छ । विलि काबलेरो, मार्कस अलोन्सो, ओलिभिएर जिरुड, ड्यानी ड्रिंकवाटर लगायत खेलाडीले क्लब छाड्ने सम्भावना रहेको छ ।