एजेन्सी – इंग्लिस प्रिमियर लिगमा वल्भ्सले सेफिल्ड युनाइटेडमाथि सहज जित हात पारेको छ । वल्भ्सले सेफिल्डमाथि उसकै मैदानमा २–० को सहज जित हात पारेको हो ।

सोमबार राति भएको खेलमा वल्भ्सको सहज जितमा राउल जिमिनेज र रोमेन सइसले गोल गरे । खेलको ६ मिनेटभित्र लिएको २–० को अग्रता नै वल्भ्सको जितमा पर्याप्त बन्यो । खेलको तेस्रो मिनेटमा नै वल्भ्सले राउल जिमिनेजको गोलमा अग्रता लिएको थियो । ड्यानियल पोडेन्सको क्रस पासमा अनमार्ककै अवस्थामा रहेका जिमिनेजले पेनाल्टी बक्सभित्रबाट उत्कृष्ट फिनिस गरेका थिए ।

पाँचौ मिनेटमा वल्भ्सका जिमिनेजको प्रहारलाई सेफिल्डका गोलरक्षक आरोन राम्सडलेले मुस्किलले विफल पारेका थिए । त्यसैमा प्राप्त कर्नरमा रोमेन सइसले गोल गर्दै वल्भ्सले अग्रता दोब्बर बनायो । पेड्रो नेटोको कर्नरमा रोमेनको हेडरलाई सेफिल्डका गोलरक्षक आरोन राम्सडलेले रोक्ने कुनै अवसर नै पाएन ।

खेलको सुरुमै २–० ले पछि परेको घरेलु टोलीले बल पोजेसनमा पकड बनाउदै वल्भ्सलाई दवावमा राखेपनि पहिलो हाफमा पोस्टमा गतिलो आक्रमण बुन्न सकेन । दोस्रो हाफमा आक्रमक खेल पस्केको सेफिल्डले वल्भ्सलाई दवाव राख्यो । ५१औं मिनेटमा जोन लन्डस्ट्रामको पासमा जोन फ्लिकको प्रहारलाई पोस्टमा लागेर फर्कदा प्राप्त रिवाउन्डमा जर्ज बालडकको प्रहारलाई वल्भ्सका कप्तान कोनोर कोडेले क्लियर गरिदिए ।

५३औं मिनेटमा रोमेन सइसको हेडर पोस्टबाट थोरै बाहिरिदा वल्भ्स फराकिलो अग्रता लिनबाट चुक्यो । ५८औं मिनेटमा जोन इगानको पासमा जोन लन्डस्ट्रामको प्रहार बाहिरिदा सेफिल्डले अग्रता घटाउन सकेन । ७३औं मिनेटमा सेफिल्डका कप्तान बिल्ली सार्प चुके ।

इन्ज्युरी समयमा ओलिभर म्याकब्रुनीको हेडरले गोलरक्षक रुई प्याट्रिसियोलाई बिट गरेपनि रोमेनले गोललाईबाट क्लियर गर्दै गोल टारे । त्यसपछि थप गोल निस्कन नसक्दा वल्भ्स २–० ले विजयी हुन सफल भयो । जितसँगै वल्भ्सले पहिलो खेलबाटै महत्वपुर्ण ३ अंक बटुल्न सफल भयो ।