एजेन्सी – इंग्लिस क्लब टोटेनहम हट्स्परले आफ्ना पूर्व खेलाडी ग्यारेथ बेललाई स्पेनिस क्लब रियल म्याड्रिडबाट फर्काउने तयारी थालेको छ ।

वेल्सका फरवार्ड बेललाई पछिल्लो समय रियल म्याड्रिडले पनि अन्यत्र जाने ढोका खोलिदिएपछि टोटेनहमले अनुबन्धनको तयारी थालेको हो । दुई क्लबबीच हाललाई लोन सम्झौताका लागि छलफल भइरहेको बुझिएको छ । बेलको तलब टोटेनहमका लागि अत्याधिक रहेकाले स्पेनिस क्लबले पनि केहि प्रतिशत बेहोर्नेगरि सम्झौता हुने सम्भावना रहेको छ ।

बेलका एजेन्ट जोन बार्नेटले मंगलबार मात्र बीबीसीसंग बोल्दै बेलले अझैपनि टोटेनहम आउन चाहेको बताएका छन् । ‘बेललाई टोटेनहम अझै मनपर्छ । हामी तीनै पक्ष अहिलेको अवस्था कसरि सुल्झाउन सकिन्छ भन्ने छलफलमा छौं । बेलको रोजाई टोटेनहम नै फर्कनेमा छ,’ बार्नेटले भने ।

बेल सन् २०१३ मा टोटेनहमबाट त्यसबेलाको विश्व कीर्तिमानी रकममा रियल म्याड्रिड पुगेका थिए । रियल म्याड्रिडमा रहेर २ सय ५१ खेल खेल्दै उनले १ सय ५ गोल गरेका छन् । यसक्रममा बेलले टोलीलाई ४ पटक च्याम्पियन्स लिग उपाधि जित्न मदत गरेका छन् । यस्तै यस अवधिमा रियल म्याड्रिडले २ पटक ला लिगा उपाधि पनि जितेको छ ।

अघिल्लो सिजन रियलले ला लिगा जित्दा भने बेल प्रशिक्षक जिदानको रोजाइमा थिएनन् । उनले पूरा सिजनमा जम्मा १६ खेलमा सहभागिता जनाए । प्रशिक्षक जिदानले बेल आफ्नो योजनामा नरहेको भन्दै व्यवस्थापनलाई समेत जानकारी दिइसकेका छन् । त्यसैले पनि क्लबले बेललाई आफ्नो कुनै प्रायोजन तथा कार्यक्रममा सहभागी गराएको छैन ।

बेलले अर्को वर्ष हुने युरोपेली च्याम्पियनसिपका लागि तयार रहन पनि पहिलो रोजाईमा खेल्न पाउने विकल्प रोजेका थिए । जोसे मोउरिन्होको नेतृत्वमा रहेको टोटेनहमलाई आक्रामक खेलाडीको आवश्यकता रहेको र बेल उचित विकल्प रहेको क्लबको बुझाइ छ । तीनै पक्षबीच सहमति हुने सम्भावना रहेको बुझिएको छ ।