एजेन्सी – बार्सिलोनाका फरवार्ड लुइस सुआरेज जिरिनोविरुद्ध बुधबार हुने मैत्रीपूर्ण खेलका लागि टोलीमा समेटिएका छन् ।

नयाँ प्रशिक्षक रोनाल्ड कोम्यानले यसअघि शनिबार जिम्नास्टिकविरुद्धको प्रि सिजनको पहिलो मैत्रीपूर्ण खेलमा सुआरेजलाई समेटेका थिएनन् । सुआरेजका लागि गन्तव्य टोलीको टुंगो लाग्न नसक्दा उनी बार्सिलोनामै प्रशिक्षण गरिरहेका छन् । युभेन्टस जाने प्रक्रिया पूरा हुन नसक्दा सुआरेज अडि्कएका हुन् ।

यसबीचमा बार्सिलोनाले मेम्फिस डेपाएलाई क्लबमा भित्र्याउने प्रक्रिया अन्तिम चरणमा पुर्याएको छ । लियोनसँग सम्पूर्ण सम्झौता पूरा भएर डिपाएसँग पनि सहमति भइसकेको छ । तर ला लिगाको नियम अनुसार खेलाडी बेचेपछि मात्र नयाँ अनुबन्ध गर्न पाइने प्रावधान छ ।

अर्कोतर्फ सुआरेजको सम्झौतामा पनि समस्या रहेको बताइएको छ । ३३ वर्षे फरवार्डले यो सिजन क्लब छाड्न परेको खण्डमा सम्झौता अनुसारको पारिश्रमिक पाउनुपर्नेमा मान्यतामा छन् । तर, बार्सिलोनामा भने तिर्ने पक्षमा छैन । बीचको बाटो निकाल्ने क्रममा बार्सिलोना सुआरेजलाई अर्को एक सिजन क्लबमै राख्नुपर्ने विकल्पमा पनि सोचिरहेको बताइएको छ ।

तर, कोम्यानले भने यसअघि नै उरुग्वेली फरवार्ड आफ्नो योजनामा नरहेको बताएका थिए । त्यसकै संकेतका रुपमा उनले पछिल्लो मैत्रीपूर्ण खेलमा सुआरेजलाई राखेनन् । यदि बार्सिलोना सहमति गर्न असफल भएको खण्डमा एक सिजन सुआरेजलाई राख्नेमा डच प्रशिक्षक तयार हुने अनुमान गरिएको छ ।