एजेन्सी – युरोपियन फुटबलको नयाँ सिजन सुरु भइसकेको छ । तर, कोभिड १९ का कारण सोचे जसरी अघि भने सिजन अघि बढ्न सकेको छैन । ला लिगामा गत सिजन राम्रो प्रदर्शन गर्न नसकेको बार्सिलोना लामो समयपछि उपाधि विहिन भएको थियो ।

कप्तान लिओनल मेस्सीले क्लब छाड्न चाहेको प्रसंगका कारण चर्चामा रहेको बार्सिलाना नयाँ सिजनको तयारीमा जुटिसकेको छ । मेस्सी पनि आफ्नो निर्णयबाट पछि हटेर प्रशिक्षणमा जुटेसँगै क्लबले राहत महसुस गरिसकेको छ । ला लिगामा यो सिजन बार्सिलोनाका सुरुवाती दुई खेल स्थगित भइसकेका छन् ।

इल्चे र एथलेटिक बिलबाओविरुद्धको खेल पछि हुनेछ । अब सेप्टेम्बर २७ मा बार्सिलोनाले भिल्लारियलको सामना गर्दै नयाँ सिजनको औपचारिक सुरुवात गर्नेछ । तर टोलीका प्रशिक्षक रोनाल्ड कोम्यानले भने त्यसमा प्रशिक्षकका रुपमा टेक्निकल लाइनमा बस्ने सम्भावना भने कम रहेको छ ।

सिजनको अन्त्यसँगै किके सेटिनलाई बर्खास्त गर्दै सो जिम्मेवारीमा डच कोम्यान नियुक्त भएका थिए । उनको नेतृत्वमा बार्सिलोनाले २ मैत्रीपूर्ण खेल पनि खेलिसकेको छ । तर, स्पेनिस फुटबल महासंघ (आरएफइएफ) मा उनको नियुक्तीको प्रक्रिया पुरा भइनसकेकोले उनी टोलीको खेलमा प्रशिक्षकका रुपमा नरहन सक्छन् ।

पुराना प्रशिक्षक स्टेन र क्लबबीच केहि सहमति हुन बाँकी रहेकोले आरएफएफले कोम्यानको कागजी प्रक्रिया पुरा गर्न नसकेको बताइएको छ । सेटिनलाई बर्खास्त गरेपछि क्षतिपूर्ति रकम तिर्नुपर्नेमा क्लबसंग सहमति हुन सकेको छैन । सेटिनले सहमति गरेर आफू निस्केको जानकारी दिएपछि मात्र कोम्यान दर्ता हुन पाउँछन् । त्यसैले अबको केहि दिनमा बार्सिलोनाले प्रक्रिया पूरा गर्नुपर्ने छ ।