एजेन्सी – जर्मन च्याम्पियन बायर्न म्युनिखबाट स्पेनिस मिडफिल्डर थियागो अलकान्टारा इंग्लिस प्रिमियर लिग च्याम्पियन लिभरपुलमा अनुबन्धित भएका छन् ।

मर्सिसाइड क्लब लिभरपुलले थियागोलाई २० मिलियन पाउन्डमा चार वर्षको लागि अनुबन्ध गर्न राजी भएको हो । थप बोनससहित यो रकम २५ मिलियन पाउन्ड पुग्नसक्ने छ । लिभरपुलले गत जुलाई देखि नै थियागोलाई अनुबन्ध गर्ने योजना बनाएको थियो । लिभरपुलमा आउने चर्चासँगै २९ वर्षीय थियागोले बायर्नमा सम्झौता नविकरण नगर्ने निर्णय लिएका थिए ।

बायर्नमा उनको सम्झौता अझै एक वर्ष बाँकी थियो । लिभरपुलमा थियागोले आफ्नो रोजाईको जर्सी नम्वर ६ नै लगाउने पक्का भएको क्लबले जनाएको छ । हाल इंग्लिस क्लब म्यानेचस्टर सिटीका तथा बार्सिलोनाका पुर्व प्रशिक्षक पेप ग्वार्डिओलाले थियागोलाई बायर्नमा सन् २०१३ मा बार्सिलोनाबाट अनुबन्ध गरेको थिए । बायर्न म्युनिखले यो सिजन च्याम्पियन्स लिगको उपाधिसहित ट्रेबल जित्दा उनी टोलीका महत्त्वपुर्ण सदस्य रहेका थिए ।

क्याटलान क्लब बार्सिलोनाबाट व्यवसायिक खेल करियर शुरु गरेका थियागोले बायर्न म्युनिखबाट ७ बुन्डेसलिगा, चार डिएफवी पोकल, तीन सुपर कप र समान एकपटक फिफा क्लब वल्डकप र युइएफए च्याम्पियन्स लिग जितेका छन् । उनले बायर्नबाट २३५ खेलमा ३१ गोल गरेका छन् ।