एजेन्सी – युरोपेली च्याम्पियन बायर्न म्युनिखका मिडफिल्डर थियागो अलाकान्टरा प्रिमियर लिग च्याम्पियन लिभरपुल आउने भएका छन् ।

बायर्न म्युनिखसँग सम्झौताको अन्तिम वर्षमा रहेका थियागोलाई अनुबन्ध गर्न लिभरपुलले ३० मिलियन युरो खर्च गर्न राजि भएको हो । यसअघि बायर्नले माग गरेको रकम दिन लिभरपुलले आनाकानी गरेको थियो । तर प्रशिक्षक योर्गेन क्लोपले थियागोलाई अनुबन्ध गर्न क्लबसमक्ष दबाब दिएपछि व्यवस्थापनले बायर्नको माग पूरा गर्दै थियागोलाई भित्र्याएको हो ।

२९ वर्षीय स्पेनिस मिडफिल्डरलाई अनुबन्ध गर्न म्यानचेस्टर युनाइटेडले पनि इच्छा व्यक्त गरेको थियो । यस्तै बायर्नले पनि थियागोलाई ४ वर्षको नयाँ सम्झौता प्रस्ताव गरेको थियो । तर थियागोले अन्तिम समयमा आफ्नो निर्णय बदल्दै नयाँ चुनौतीका लागि प्रिमियर लिग जाने निर्णय लिएका हुन् । थियागोले लिभरपुल र म्यानचेस्टर युनाइटेड दुवै क्लबसँग छलफल गरेको बायर्नका बोर्ड सदस्य उली होनेसले बताए ।

थियागोलाई अनुबन्ध गर्न म्यानचेस्टर युनाइटेडले भने कुनै आधिकारिक प्रस्ताव राखेको थिएन । लिभरपुलले भने माग गरेभन्दा कम रकम प्रस्ताव गर्दै थियागो अनुबन्ध गर्न खोजेको थियो । तर होनेसका अनुसार लिभरपुल र युनाइटेडले ट्रान्सफर विन्डोको अन्तिमसम्म थियागोको भाउ घटाउने प्रयास गरेका थिए । बायर्नले कुनै हालतमा कम रकममा नबेच्ने बरु एक सिजनपछि फ्री ट्रान्सफरमा जान दिने बताएपछि लिभरपुल दबाबमा आएको थियो ।

बार्सिलोनाको एकेडेमी ला मासियामा हुर्किएका थियागोले बायर्नमा सम्भव सबै उपाधि जितेकाले नयाँ चुनौतीका लागि यो निर्णय लिएको बुझिएको छ । बायर्नले थियागोलाई प्रिमियर लिग क्लबले दिएजति तलब दिने बताएपनि आर्थिक पाटोमा कुनै समस्या नरहेको बताएको छ । च्याम्पियन्स लिग उपाधि जित्नुअघि थियागो दुविधामा रहेपनि उक्त जितपछि थियागोले सम्भव सबै उपाधि जितेको भन्दै क्लब छाड्न चाहेका थिए ।