एजेन्सी – विश्व फुटबलकै उत्कृष्ट खेलाडी मध्येका एकका रुपमा परिचय बनाएका अर्जेन्टिनी लिओनल मेस्सीका नामा थुप्रै कीर्तिमान छन् । यहि क्रममा उनले अर्को इतिहास बुनेका छन् ।

मेस्सी बार्सिलोनामा आबद्ध भएको २० वर्ष पुरा भएको छ । उनी पहिलो पटक सन् २००० सेप्टेम्बर १७ मा बार्सिलोना पुगेका थिए । सुरुवाती समय ला मासियामा बिताएका उनी अर्जेन्टिनाको नेवेल्स ओल्ड ब्वाइजबाट बार्सिलोना आएका थिए । यो वर्ष उनले सिनियर टोलीबाट खेलेको १७ औं सिजन हो । यो अवधिमा उनले आफुलाई ब्राम्हान्डकै सफल खेलाडीका रुपमा स्थापित गराउन सफल भएका छन् ।

फुटबल इतिहासमै सफल खेलाडीमध्ये उनी एक भएको मान्ने थुप्रै छन् । बार्सिलोनामा उनका थुप्रै अविष्मरणीय क्षण छन् । गत सिजनको अन्त्यमा उनले बार्सिलोना छाड्न चाहेको पत्र क्लबलाई लेखेका थिए । तर, क्लब उनलाई छाड्न तयार भएन ।

७ सय मिलियन युरो रिलिज क्लज तिरेको खण्डमा मात्र क्लब उनलाई छाड्न तयार भएपछि कप्तान मेस्सीले आफ्नो निर्णय बदले र कम्तीमा यो सिजन बार्सिलोनामै रहने निर्णय गरे । जसले गर्दा बार्सिलोनामा उनको २० वर्ष पुरा भएको छ ।

६ पटक बालोन डी ओर जितेका मेस्सीले बार्सिलोनाको अधिकांश उपाधिमा महत्त्वपूर्ण भूमिकामा रहँदै आएका छन् । मेस्सीले बार्सिलोनामा १० पटक ला लिगा उपाधि, ६ पटक कोपा डेल रे, ७ पटक सुपरकोपा डी स्पाना, ४ पटक च्याम्पियन्स लिग, ३ पटक सुपर कप र ३ पटक फिफा क्लब विश्वकप जितेका छन् ।