एजेन्सी – जर्मन फुटबलको ११ औं श्रेणीअन्तर्गत आइतबारको खेलमा रिपडोर्फले खेल अवधिभर सामाजिक दुरी कायम गर्दा एसभी होल्डेनस्टेटसँग ३७-० को हार बेहोरेको छ ।

होल्डेनस्टेटको अघिल्लो खेलको प्रतिद्वन्द्वीका एक खेलाडीमा कोरोना संक्रमण देखिएपछि रिपडोर्फले खेल स्थगित गर्न माग गरेको थियो । तर लिगले उक्त प्रस्ताव अस्विकार गरेपछि रिपडोर्फ खेलमा उत्रन बाध्य भयो । यदि खेलमा उपस्थित नहुँदा टोलीले स्वत: हार बेहोरेसंगै आर्थिक जरिवाना पनि बेहोर्ने थियो ।

रिपडोर्फका खेलाडीले होल्डेनस्टेटसँग प्रतिस्पर्धा गर्न नमानेपछि क्लबले सामाजिक दुरी कायम गरेर नै खेल्ने निर्णय लियो । खेलका लागि चाहिने न्युनतम ७ खेलाडीलाई मात्र मैदान पठाएको रिपडोर्फका खेलाडीले बलमा जुध्न गएनन् । खेलको सुरुवातमा बल चलाएर विपक्षीलाई पास दिएपछि रिपडोर्फका खेलाडी मैदानकको एक छेउमा बसेका थिए ।

पराजित रिपडोर्फका सह अध्यक्ष प्याट्रिक रिसोले विपक्षी टोलीले अवस्थाको गाम्भीर्यता नबुझेको आरोप लगाए । ‘ होल्डेनस्टेटले हामी कस्तो स्थितिबाट गुज्रिरहेको बुझ्न सकेन । हामी कुनै जोखिम लिने अवस्थामा थिएनौं । हाम्रा कति खेलाडीले खेल्ने मन गरेनन् र उपलब्ध केहिलाई पनि सामाजिक दुरीका रुपमा दुई मिटर टाढा नै रहन भनेका थियौं,’ उनले भने ।

यता क्खेल दौरान २-३ मिनेटको अन्तरमा गोल गरेको होल्डेनस्टेटका प्रशिक्षक फ्लोरियन सिएरवाटरले भने खेल रोक्नुपर्ने अवस्था नरहेको बताए । ‘खेल रोक्नुपर्ने कारण थिएन । हाम्रो टोली संक्रमितसँग प्रत्यक्ष सम्पर्कमा आएको थिएन । हाम्रा कति खेलाडीले त परिक्षण पनि गर्नु परेन,’ उनले प्रष्ट पारे ।