एजेन्सी – जर्मन बुन्डेसलिगाको नयाँ सिजन आज (शुक्रबार) बाट सुरु हुँदैछ । नयाँ सिजनको पहिलो दिन एक खेलमा मात्रै प्रतिस्पर्धा हुनेछ ।

पहिलो दिनको पहिलो खेलमा साविक विजेता बायर्न म्युनिखले घरेलु मैदानमा साल्केको आतिथ्यता गर्दैछ । खेल बायर्नको मैदान एलिएन्ज एरिनामा नेपाली समयअनुसार राति १२ः१५ बजे सुरु हुनेछ ।
च्याम्पियन बायर्न घरेलु मैदानमा साल्केलाई पराजित गर्दै सुखद सुरुवात गर्ने लक्ष्यमा हुनेछ ।

साल्केविरुद्ध बायर्नका रोवर्ट लेवान्डोस्की मुख्य हतियार हुनेछन् । उनले अघिल्लो सिजन पनि ३१ खेलमा ३४ गोल गरेका थिए । उनलाई थोमस मुलर, लिरोए साने, सर्जी जिनाब्री, जोसुवा किम्मिच, अलफन्सो डाभिस, डेभिड अलवा, निकलस सुल र कप्तान म्यानुयल नोयरले साथ दिनेछन् ।

लिरोए सानेले बायर्नबाट डेब्यु गर्ने सम्भावना रहँदा किङ्सले कोमानले खेल्ने सम्भावना न्युन छ । थियागो अलकान्तरा लिभरपुल जाने तयारीमा छन् । यता, साल्के पनि बायर्नलाई स्तब्ध पार्दै सुखद सुरुवात गर्ने लक्ष्यमा हुनेछ । तर, बलियो टोलीविरुद्ध साल्केलाई गाह्रो हुनेछ । अघिल्लो सिजनको दुवै खेलमा बायर्न विजयी भएको थियो ।

बायर्नले घरेलु मैदानमा ५–० को जित निकाल्दा साल्केको मैदानमा १–० को जित निकालेको थियो । बायर्न सोही जितलाई निरन्तरता दिने दाँउमा रहँदा साल्के पनि बायर्नसँगको हारको श्रृंखला तोड्ने दाँउमा हुनेछ ।

यि दुई टोली हालसम्म २७ पटक आमनेसामने हुदा २१ पटक बायर्न र ३ पटक साल्के विजयी हुदा ३ खेल बरारबरीमा टुंगिएको छ । साल्केले पछिल्लोपटक २०१० मा २–० को जित निकालेको थियो । त्यसयता साल्केले बायर्नलाई हराउन सकेको छैन ।