एजेन्सी – इंग्लिस क्लब म्यानचेस्टर युनाइटेडका पोर्चुगिज मिडफिल्डर बुर्नो फर्नान्डेसले ‘सर म्याट बस्बी प्लेयर अफ दि इयर’ अवार्ड जितेका छन् ।

युनाइटेड आएका पहिलो सिजनमा नै फर्नान्डेसले सर म्याट बस्बी प्लेयर अफ दि इयर अवार्ड जितेका हुन् । क्लबको समर्थकको भोटको आधारमा फर्नान्डेसले अवार्ड जितेका हुन् । जनवरीमा पोर्चुगिज क्लब स्पोर्टिङ लिस्वनबाट युनाइटेड पुगेका फर्नान्डेसले गत सिजन २२ खेलमा १२ गोल र ८ गोलका लागि असिस्ट दिएका थिए ।

म्यानचेस्टर युनाइटेडको पूर्व प्रशिक्षक सर म्याट बस्बीको सम्मानमा युनाइटेडले हरेक वर्ष यस अवार्ड प्रदान गर्ने गर्छ । युनाइटेडका गोलरक्षक डेभिड डि गेयाले सर्वाधिक चारपटक जितेका छन् । यस्तै क्रिस्टियानो रोनाल्डोले ३ पटक जितेका थिए ।

स्पोर्टिङ लिस्बनको मागअनुसार नै ट्रान्सफर रकम तिर्दै ब्रुनो लामी समयको प्रतीक्षापछि जनवरीमा युनाइटेड आएका थिए । प्रशिक्षक ओले गनर सोल्सायरको नेतृत्वमा टोलीले अपेक्षित प्रदर्शन गर्न सकेको थिएन । मिडफिल्डर पल पोग्बाको चोट र सम्बन्धमा आएको चिसोपनले प्रत्यक्ष असर गरेको देखिन्थ्यो ।

मिडफिल्डको मध्यभागमा खेल्ने ब्रुनोले आक्रमणमा बेग्लै शक्ति थपेका छन् । रक्षात्मक रणनीतिमा पनि उनको उपस्थिति देखिन्छ । उनले बल पोसेसनसँगै फरवार्डहरुलाई प्रयोग गर्ने क्षमता राख्दछन् ।

प्रिमियर लिगमा आउने बितिकै ब्रुनोले छोडेको प्रभाव प्रशंसनीय छ । सामान्यतया अन्य लिगको तुलनामा प्रिमियर लिग कठिन मानिने गर्छ । प्रतिद्वन्द्वीको स्तरमात्र नभएर यसले माग गर्ने शक्ति जो कोहिले सुरुवातमै मिलाउन सक्दैन । तर ब्रुनोको प्रदर्शन हेर्दा उनले लामो समयदेखि यसै लिगमा खेलेझैं लाग्छ ।

ब्रुनो खेलमा जोखिम लिन माहिर खेलाडी हुन् । सधैं बलकै वरपर रमाउने उनी सकेसम्म चाडो बल अगाडी बढाउन खोज्छन् । उनी सामान्यतया छोटो र सहज पास खेल्न चाहदैनन् । उनको खुट्टामा बल परेपछि केहि फरक हुन्छ भन्ने अपेक्षा हुन्छ र उनले कमै मात्र निराश तुल्याउँछन् । लगातार राम्रो प्रदर्शनका कारण नै उनले क्लबका लागि पहिलो सिजनमा कम खेल खेलेपनि अवार्ड जित्न सफल रहे ।