एजेन्सी – सर्ज जिनाब्रीको ह्याट्रिक मद्दतमा च्याम्पियन बायर्न म्युनिखले नयाँ सिजनको जर्मन बुन्डेसलिगामा सानदार सुरुवात गरेको छ । बायर्नले घरेलु मैदानमा साल्केमाथि ८–० को प्रभावशाली जित निकालेको हो ।

बायर्नको जितमा जिनाब्रीले ह्याट्रिक पुरा गर्दा रोवर्ट लेवान्डोस्की, लियोन गोरेट्जका, थोमस मुलर र बायर्नका लागि ‘डेब्यु’ खेल खेलिरहेका लिरोए सानेले पनि गोल गरे । पहिलो हाफमा ३ तथा दोस्रो हाफमा ५ गोल सम्भव भएको थियो ।

एलिएन्ज एरिनामा शुक्रबार राति गोलको वर्षा भएको खेलमा बायर्नले खेलको चौथो मिनेटमा नै जिनाब्रीको गोलबाट बायर्नले अग्रता बनाएको थियो । मैदानको मध्यभागबाट जोसुवा किम्मिचले दिएको लामो पासलाई जिनाब्रीले नियन्त्रणमा लिदै पेनाल्टी बक्सभित्रबाट गरेको प्रहार गालमा परिणत भएको थियो ।

१९औं मिनेटमा लियोनले गोल गर्दै बायर्नको अग्रता दोब्बर पारे । थोमस मुलरको पासमा लियोनले पेनाल्टीबक्सको ठीक बाहिरबाट गरेको प्रहारलाई साल्केका गोलरक्षकले रोक्ने कुनै अवसर नै पाएन । २६औं मिनेटमा साल्केका गोलरक्षक राल्फ फहरमानले जिनाब्रीको पासमा जोसुवाको प्रहारलाई विफल पारेका थिए ।

३१औं मिनेटमा बायर्नले पेनाल्टी गोलमार्फत खेलमा ३–० को अग्रता लिन सफल भयो । पेनाल्टी बक्समा ओजन कावकले आफैलाई फल गरेपछिको प्राप्त पेनाल्टीमा लेवान्डोस्कीले गोल गर्न सफल भएका थिए ।

दोस्रो हाफको शुरुमै जिनाब्रीले व्यक्तिगत दोस्रो तथा टोलीको लागि चौथो गोल गर्दै बायर्नलाई फराकिलो जिततर्फ अग्रसर गराए । जिनाब्रीकै पासमा लिरोए सानेले एक डिफेन्डर र गोलरक्षकलाई बिट गर्दै दिएको पासमा जिनाब्रीले खाली पोस्टमा जाली चुमाएका थिए ।

५९औं मिनेटमा जिनाब्रीले ह्याट्रिक पुरा गर्दा बायर्नले खेलमा ५–० को अग्रता लियो । लिरोए सानेले अघि बढ्दै एक डिफेन्डर र गोलरक्षकलाई बिट गर्दै दिएको पासमा जिनाब्रीले ह्याट्रिक पुरा गरे ।६९औं मिनेटमा लेवान्डोस्कीको पासमा थोमस मुलरले गोल गरेपछि बायर्न खेलमा ६–० ले अघि बढ्यो ।

त्यसको दुई मिनेटपछि जोसुवा किम्मिचको पासमा लिरोए सानेले बायर्नका लागि पहिलो गोल गरे । ८१औं मिनेटमा लेवान्डोस्कीकै पासमा सब्सिच्युट जमल मुसिएलाले गोल गर्दै बायर्नलाई ८–० को फराकिलो जित दिलालए ।

जमल ७३औं मिनेटमा सर्ज जिनाब्रीको स्थानमा मैदान छिरेका थिए ।
साल्केले भने कुनै पनि समय बायर्नको पोस्टमा गतिलो आक्रमण बुन्न सकेन । जितसँगै बायर्नले ३ अंक जोडेको छ । पराजित साल्के अंकविहीन छ ।