एजेन्सी – उरुग्वेली फरवार्ड लुइस सुआरेजले इटालियन नागरिकताको लागि आवेदन दिने क्रममा सहभागी भएको परिक्षामा चोरी गरेको आरोप लागेको छ । इटालियन पुलिसले उक्त आरोपबारे विस्तृत छानविन समेत थालेको छ ।

सुआरेज गत साता पेरुजिया पुगेर इटालियन भाषा परिक्षामा सामेल भएका थिए । इटालियन च्याम्पियन युभेन्टसले सुआरेज अनुबन्ध गर्न इच्छा देखाएपछि उनी नागरिकता लिन परिक्षामा उपस्थित भएका थिए । सुआरेजकी पत्नीको पूर्वजहरु इटालीकै भएका कारण उनले नागरिकता लिन भाषा परिक्षामा उतिर्ण भए पुग्ने थियो ।

इटालियन संचारमाध्यमका अनुसार ३३ वर्षीय सुआरेजले परिक्षा दिनुअघि नै प्रश्न प्राप्त गरेका थिए । त्यसैले सामान्यतया २ घण्टा लाग्ने परिक्षा ३० मिनेट नबित्दै सकिएको प्रहरी स्रोत उदृत गर्दै इटालीको रिपब्लिका पत्रिकाले जनाएको छ ।

‘सुआरेज इटालियन बोल्न जान्दैनन् । उनलाई पूरा वाक्य प्रष्ट जोड्न पनि कठिन हुन्छ । पत्रकारले सामान्य प्रश्न सोधेपनि उनलाई जवाफ फर्काउन कठिनाइ छ । उनी वर्षको १० मिलियन युरो कमाउँछन् र उनले परिक्षा उत्तीर्ण गर्नुको विकल्प छैन,’ प्रहरी स्रोतले भनेको छ ।

परिक्षा उत्तीर्ण गर्नका बाबजुद अब सुआरेज युभेन्टस जाने सम्भावना भने समाप्त भएको छ । सुआरेजले नागरिकता प्राप्त गर्ने मिति केहि ढिला भएपछि युभेन्टसले एटलेटिको म्याड्रिडबाट अल्भारो मोराटालाई अनुबन्ध गर्ने निर्णय लिएको थियो । नन युरोपियन खेलाडीको रुपमा अनुबन्ध गर्नको लागि पनि युभेन्टसको कोटा पुगिसकेको छ । युभेन्टसमा नन युरोपियनका दुई खेलाडी आर्थर मेलो र वेस्टन म्याकेनी आइसकेका छन् ।

सुआरेज अब एटलेटिको जाने सम्भावना रहेको छ । सुआरेज र एटलेटिकोबीच छलफल भएपनि बार्सिलोनाले आफ्नो प्रतिद्वन्द्वीलाई बेच्न केहि सर्त राख्ने बुझिएको छ ।