एजेन्सी – इंग्लिस प्रिमियर लिगको वल्भ्सले क्याटलान क्लब बार्सिलोनाबाट पोर्चुगिज डिफेन्डर नेल्सन सेमेडोलाई अनुबन्ध गरेको छ ।

प्रिमियर लिग क्लबले सेमेडो अनुबन्ध गर्न ३७ मिलियन पाउण्ड खर्च गरेको हो । सिजनको सुरुवातमा वल्भ्सका डिफेन्डर म्याट डोहर्टि १२ मिलियन पाउण्डमा टोटेनहम गएपछि वल्भ्सले सेमेडो अनुबन्ध गरेको हो । वल्भ्सको टोलीमा सेमेडो दशौं पोर्चुगिज खेलाडी हुन् । प्रशिक्षक नुनो एस्पिरितो सान्तो पनि पोर्चुगलका नै हुन् ।

२६ वर्षीय सेमेडोले बार्सिलोनाका लागि १ सय २४ खेल खेलेका थिए । उनले पोर्चुगलको राष्ट्रिय टोलीका लागि पनि १३ खेल खेलिसकेका छन् । सेमेडोले वल्भ्समा २०२३ सम्मका लागि अनुबन्ध गरेका छन् । सेमेडो अनुबन्ध गर्नु क्लबका लागि अर्को स्तरमा फड्को मारेको संकेत रहेको क्लबका कार्यकारी अध्यक्ष जेफ सीले बताए ।

बार्सिलोनामा नयाँ प्रशिक्षक रोनाल्ड कोम्यानको आगमनसँगै सेमेडो उनको योजनामा रहेका थिएनन् । बार्सिलोनाले आयाक्सका सर्जिनो डेस्टलाई उक्त पोजिसनमा अनुबन्ध गर्ने तयारी गरिरहेको छ ।

सेमेडोअघि वल्भ्सले पोर्टोबाट फाबियो सिल्भालाई अनुबन्ध गरेको थियो । २० वर्षीय पोर्चुगिज फरवार्डका लागि वल्भ्सले ३५ मिलियन पाउण्ड खर्चेको थियो । वल्भ्सले यसै साता लिभरपुलका डिफेन्डर कि-जाना होएभरलाई पनि अनुबन्ध गरेको छ । फरवार्ड डिओगो जोटा भने वल्भ्सबाट लिभरपुल गएका थिए ।

सेमेडोले वल्भ्समा अनुबन्ध हुन पाउँदा निकै खुसी लागेको बताए । ‘गत सिजन वल्भ्सका लागि निकै राम्रो सिजन रहयो । इंग्ल्यान्ड मात्र नभएर युरोपमा पनि राम्रो प्रदर्शन थियो । यो सिजन अझ राम्रो गर्ने प्रयास रहनेछ,’ उनले भने, ‘नुनो एकदम राम्रो प्रशिक्षक हुन् । उनले वल्भ्स मात्र नभएर अन्य टोलीमा पनि प्रभाव छाडेका छन् । मैले उनीबाट धेरै सिक्नेछु ।’