एजेन्सी – इंग्लिस क्लब म्यानचेस्टर सिटीलाई सिजनको सुरुवातमै मुख्य खेलाडीलाई चोट लागेका कारण ठूलो संकट परेको छ ।

ब्राजिलियन फरवार्ड ग्याब्रियल जेसस तीन साता मैदान बाहिर रहने भएका छन् । प्रिमियर लिग अन्तर्गत गत सोमबार वल्भ्सविरुद्ध ३–१ को जित निकालेको खेलमा जेससले चोट बोकेका थिए । मुख्य फरवार्ड सर्जियो अगुएरो अघिल्लो सिजन नै शल्यक्रिया पश्चात विश्राममा रहेको अवस्थामा जेससको चोटले थप संकट परेको हो ।

चोटकै कारण २३ वर्षीय जेसस ब्राजिलका लागि विश्वकप छनोटको दुई खेलसँगै प्रिमियर लिगका महत्त्वपूर्ण खेल गुमाउनेछन् । ब्राजिलका प्रशिक्षक टिटेले जेससलाई राष्ट्रिय टोलीबाट बाहिर राख्दै जर्मन क्लब हर्था बर्लिनका फरवार्ड म्याथुइस कुन्हालाई टोलीमा समेटेको छ ।

ब्राजिलले अक्टोबर दोस्रो साता विश्वकप छनोटमा बोलिभिया र पेरुसँग प्रतिस्पर्धा गर्दैछ । ब्राजिलले ९ अक्टोवरमा बोलिभिया र १३ अक्टोवरमा पेरुसँग प्रतिस्पर्धा गर्ने तालिका छ । फुटबल कन्फेडेरेसन (सिबिएफ) ले जेससको चोटको पुष्टि गर्दै उनको स्थानमा विश्वकप छनोटको दुई खेलका लागि म्याथुइज कुन्हालाई टोलीमा समेटेको विज्ञप्तिमा उल्लेख छ ।

गत बुधबार म्यानचेस्टर सिटीका फिजियोहरुले ब्राजिली राष्ट्रिय टोलीका फिजियोसँग सम्पर्क गर्दै उनको चोटबारे जानकारी गराएका थिए । जेससले वल्भ्सविरुद्धको खेलमा पुरै ९० मिनेट खेलेका थिए । उनले इन्ज्युरी समयमा पनि गोल गरेका थिए ।

चोट बोकेसँगै सिटीले कारवाओ कपका लागि जेससलाई टोलीमा समेटेका थिएनन् । उनको स्थानमा प्रशिक्षक पेप ग्वार्डिओलाले १७ वर्षीय लियाम डिलापलाई मौका दिएको थियो । उनले सिनियर टोलीको डेब्यु खेलमा गोल गरेका थिए ।

जेससले चोट बोकेसँगै सिटीलाई थप समस्या सिर्जना भएको छ । प्रिमियर लिगको उपाधि जित्ने लक्ष्य बोकेको सिटीसँग अब सिनियर टोलीमा अनुभवी स्ट्राइकर छैन । सिटीले यो तीन साताको अवधिमा प्रिमियर लिगमा लेस्टर सिटी र लिड्स युनाइटेडसँग प्रतिस्पर्धा गर्दैछ । कारवाओ कपमा बर्नलीसँग खेल्दैछ ।

सिटीका प्रशिक्षक पेप ग्वार्डिओलाले आफुसँग अहिले सिनियर टोलीमा १३ खेलाडी मात्रै फिट रहेको बताएका छन् । अगुएरो र जेसससँगै इल्केए गुन्डोगान, बर्नाडो सिल्भा, एमेरिक लोपोर्टे, जोओ क्यान्सिलो र ओलेकसन्डर जिनचेन्को चोटसँग जुधिरहेका छन् ।