एजेन्सी – इंग्लिस प्रिमियर लिगमा आज (शनिबार) राति विभिन्न चार खेलमा प्रतिस्पर्धा हुँदैछ । म्यानचेस्टर युनाइटेड ब्राइटनको भ्रमणमा निस्कदा चेल्सी पनि वेस्ट ब्रुमको भ्रमणमा निस्कनेछ ।

ब्राइटन र युनाइटेडबीचको खेल नेपाली समयअनुसार ब्राइटनको मैदानमा साँझ ५ः१५ बजेपछि हुनेछ । प्रिमियर लिगमा ब्राइटनको यो तेस्रो तथा युनाइटेडको दोस्रो खेल हो । प्रिमियर लिगमा ब्राइटन दोस्रो जितको खोजीमा हुनेछ । प्रिमियर लिगको पहिलो खेलमा चेल्सीसँग ३–१ ले पराजित भएको ब्राइटनले दोस्रो खेलमा न्युक्यासल युनाइटेडमाथि ३–० को सहज जित हात पारेको थियो । ब्राइटन सोही प्रदर्शनलाई निरन्तरता दिने योजनामा हुनेछ ।

ब्राइटनका लागि निल मोउपे, आरोन कोनोल्ली, लियोन्द्रो ट्रोससार्ड, लेविस डन्क, बिन ह्वाइट, एडम वेव्सस्टेर, सोली मार्च र म्याथ्यु रायन टोलीमा हुनेछन् । प्रतिबन्धका कारण यभेस बिसोउमा टोलीमा रहनेछैनन् ।

यता, पहिलो खेलमा नै क्रिस्टल प्यालेससँग ३–१ ले पराजित भएको म्यानचेस्टर युनाइटेड प्रिमियर लिगमा ब्राइटनलाई पराजित गर्दै पहिलो जितको खोजीमा हुनेछ । एन्थोनी मार्सियल, मार्कस रासफोर्ड, ड्यानियल जेम्स, ब्रुनो फर्नान्डेस, पल पोग्वा, ह्यारी मगाएर टोलीसँग रहनेछन् ।

यि दुई टोली ७ पटक आमने सामने हुदा म्यानचेस्टर युनाइटेडले ५ खेलमा सफलता हात पारेको छ । ब्राइटन दुई खेलमा विजयी भएको छ । पछिल्लोपटक ब्राइटनले २०१८ अगस्टमा युनाइटेडलाई ३–२ ले पराजित गरेको थियो । त्यसयताको सबै तीन खेलमा युनाइटेड विजयी भएको छ ।