एजेन्सी – स्पेनिस ला लिगामा आज (शनिबार) राति विभिन्न चार खेलमा प्रतिस्पर्धा हुदैछ । अघिल्लो सिजनको ला लिगा च्याम्पियन रियल म्याड्रिडले आफ्नो दोस्रो खेलमा रियल बेटिससँग प्रतिस्पर्धा गर्दैछ ।

रियल म्याड्रिड र रियल बेटिसबीचको खेल बेटिसको मैदानमा नेपाली समयअनुसार राति १२ः४५ बजेपछि हुनेछ । बराबरीबाट ला लिगाको नयाँ सिजन सुरुवात गरेको च्याम्पियन रियल म्याड्रिड दोस्रो खेलमा जित निकाल्ने लक्ष्यमा हुनेछ ।

रियल पहिलो खेलमा अग्रपङ्तिमा चुक्दा रियल सोसिडाडसँग गोलरहित बराबरीमा रोकिएको थियो । सो खेलको कमजोरी स्कोरिङ सुधार्दै रियल म्याड्रिड जितको लयमा उभिन चाहन्छ । फिटनेसका कारण इडेन हाजार्ड टोलीमा समेटिएका छैनन् ।

अग्रपङ्तिमा करिम बेन्जेमालाई बाजिली युवा स्टारद्धय भिनिसियस जुनियर र रोड्रिगोसँगै लुकास भास्क्वेजले साथ दिनेछन् । मिडफिल्डमा टोनी क्रुस, क्यासमिरो, लुका मोड्रिच, फेडरिको भाल्भेर्डे, इस्को र मार्टिन ओडेगार्ड रहनेछन् । डिफेन्समा कप्तान सर्जियो रामोस, राफयल भरान, फर्लान्ड मेन्डी, ड्यानी कार्भाजल रहनेछन् । ब्याक इन्ज्युरीका कारण मार्सेलोले बेटिसविरुद्ध खेल्ने सम्भावना न्युन छ । गोलरक्षकमा थिवाउट कोर्टुवा रहनेछन् ।

यता, सुरुवाती दुई खेलमा शत प्रतिशत जित निकालेको रियल बेटिस लगातार तेस्रो जितसहित रियल म्याड्रिडलाई स्तब्ध बनाउने योजनामा हुनेछ । बेटिसले पहिलो खेलमा डिपोर्टिभो एलाभेसलाई १–० ले तथा दोस्रो खेलमा रियल भालाडोलिडलाई २–० ले पराजित गरेको थियो ।

यल बेटिस सोही जितको लयलाई निरन्तरता दिने लक्ष्यमा मैदानमा उत्रनेछ । बेटिससँग नविल फेकिर, विलियम कार्भाल्हो, सर्जियो कानालेस, जोआक्विन, इमर्सन, मार्क बार्टा, एलेक्स मोरेना तथा गोलरक्षक क्लाउडियो ब्राभो रहनेछन् ।

यि दुई टोली १६ पटक आमने सामने हुदा रियल १० खेलमा विजयी भएपछि पछिल्लो खेलमा रियल बेटिससँगको प्रदर्शन खराव रहेको छ । पछिल्लो तीन खेलमा रियल म्याड्रिड बेटिससँग दुई खेलमा पराजित तथा एक खेलमा गोलरहित बराबरीमा रोकिएको छ । त्यसलै म्याड्रिड बेटिसविरुद्ध सचेत भएर खेल्नेछ ।

बेटिसले ४ खेल आफ्नो पक्षमा पार्दा दुई खेल बराबरीमा टुंगिएको छ । रियलले रियल बेटिसलाई पछिल्लोपटक २०१९ जनवरीमा २–१ ले पराजित गरेको थियो ।