एजेन्सी – जर्मन बुन्डेसलिगा क्लब साल्केको आफ्ना मुख्य प्रशिक्षक डेभिड वाग्नरलाई बर्खास्त गरेको छ । नयाँ सिजनको सुरुवाती दुई खेलमा हार बेहोरेपछि क्लबले प्रशिक्षक वाग्नरलाई बर्खास्त गरेको हो ।

बुन्डेसलिगाको नयाँ सिजनको पहिलो खेलमा साल्के च्याम्पियन बायर्न म्युनिखसँग ८–० ले तथा वेर्डर ब्रेमेनसँग ३–१ ले पराजित भएको थियो । साल्केले नयाँ सिजनको सुरुवाती दुई खेलमा नै हारबाट सुरुवात गरेपछि संघर्ष गरिरहेका मुख्य प्रशिक्षक वाग्नरलाई बर्खास्त गरेको पुष्टि गरेको छ । साल्केले बुन्डेसलिगाको पछिल्लो १८ खेलमा जितको स्वाद चाख्न पाएको छैन ।

४८ वर्षीय प्रशिक्षक गत वर्ष मे मा तीन वर्षको लागि साल्केको मुख्य प्रशिक्षक बनेका थिए । तर, उनी दोस्रो वर्षमै बर्खास्तीमा परे । सुरुवातमा उनको प्रशिक्षणमा साल्केले उत्कृष्ट सुरुवात गरेपनि सोही लयलाई निरन्तरता दिन सकेनन् । उनको प्रशिक्षणमा साल्केले ४० खेल खेल्दा समान १२ जित र १२ बराबरी तथा १६ खेलमा हारको नतिजा निकालेको थियो ।

गत सिजन तीन हारका साथ च्याम्पियन लिगलाई छनोट भएको टोली सिजनको मध्यतिरदेखि लगातारको हारले अघिल्लो सिजन १२औं स्थानमा रहेर बुन्डेसलिगा अन्त्य गरेको थियो । टोली रेलिगेसन प्लेअफभन्दा मात्रै ८ अंक माथि रहेको थियो । साल्केको नयाँ सिजनको दुई खेलमा ११ गोल खाइसक्दा मात्रै एक गोल गरेको छ ।