एजेन्सी – इंग्लिस फरवार्ड जेमी भार्डीले ह्याट्रिक प्रहार गरेपछि प्रिमियर लिग अन्तर्गत लेस्टर सिटीले म्यानचेस्टर सिटीको मैदानमा ५-२ को सानदार जित दर्ता गरेको छ ।

प्रशिक्षक पेप गुआर्डीओलाले आफ्नो प्रशिक्षण करिअरमै पहिलो पटक ५ गोलको सामना गर्नुपर्यो । खेलमा सिटीले अग्रता लिएपनि त्यसलाई जोगाउन सकेन । लेस्टरकै पूर्व खेलाडी रियाद माहरेजले चौथो मिनेटमा गोल गर्दै सिटीलाई अघि बढाएका थिए ।

पहिलो हाफको ३७ औं मिनेटमा भार्डीलाई काइल वाल्करले पेनाल्टी क्षेत्रभित्र लडाएपछि प्राप्त पेनाल्टीमा भार्डीले गोल गर्दै खेल बराबरीमा ल्याए । दोस्रो हाफको सुरुवातमा नै लेस्टरले भार्डीको गोलमा अग्रता लियो । तिमोथी कास्तागनेले दिएको लो क्रसलाई भार्डीले डिफेन्डर एरिक गार्सिया र गोलरक्षक एडरसनलाई चलाखीपूर्ण फ्लिकमा बिट गर्दै गोल गर्न सफल रहे ।

त्यसको ४ मिनेट नबित्दै भार्डीले पेनाल्टीमार्फत गोल गर्दै आफ्नो ह्याट्रिक पूरा गरे । ७७ औं मिनेटमा जेम्स म्याडीसनले पेनाल्टी क्षेत्र बाहिरबाट सानदार गोल गर्दै लेस्टरलाई फराकिलो जिततर्फ उन्मुख गराए । केहि बेरमा नै घरेलु टोली सिटीको पनि खेलमा फर्कने आशा जाग्यो । ८४ औं मिनेटमा नाथन आकेले गोल गर्दै झिनो सम्भावना जगाए । यसै सिजन सिटी आएका आकेले माहरेजको कर्नरमा हेडरमार्फत गोल गरेका थिए ।

तर बेन्जामिन मेन्डीले पेनाल्टी क्षेत्रभित्र म्याडीसनलाई लडाएपछि रेफ्रीले खेलको तेस्रो पेनाल्टी दिए । भार्डी परिवर्तन भइसकेको अवस्थामा युरी टिलेमान्सले पेनाल्टीमा गोल गर्दै फराकिलो जित पक्का गरे ।

यस जितसँगै लेस्टर अंक तालिकाको शीर्षस्थानमा उक्लेको छ । ३ खेलमा समान ९ अंक जोडेको एभर्टन गोलअन्तरको आधारमा दोस्रो स्थानमा छ । म्यानचेस्टर सिटी भने २ खेलमा ३ अंकसहित १३ औं स्थानमा छ ।