एजेन्सी – स्पेनिस ला लिगा अन्तर्गत क्याटलान क्लब बार्सिलोनाले आइतबार लिगको पहिलो खेल खेल्दै भिल्लारियलमाथि ४-० को सहज जित दर्ता गर्यो । बार्सिलोनाको जितमा युवा विंगर अन्सु फाती एक्लैले २ गोल गरेका थिए ।

कप्तान लिओनेल मेस्सीसँग उत्कृष्ट तालमेल देखाउँदै प्रभावशाली प्रदर्शन गरेका फाती उच्च प्रदर्शन गर्नुका बाबजुद म्यान अफ द म्याच भने चुनिएनन् । खेलको १५ औं जोर्डी अल्बाको कटब्याकमा गोल गर्दै फातीले लिगको नयाँ सिजनमा पहिलो गोल गरेका थिए । त्यसको ४ मिनेट नबित्दै फिलिपे कोउटिन्होको पासमा फातीले व्यक्तिगत दोस्रो गोल गरे ।

३५ औं मिनेटमा फातीकै कारण बार्सिलोनाले पेनाल्टी प्राप्त गरेको थियो । मारियो गास्पारले पेनाल्टी क्षेत्रभित्र फातीलाई लडाएपछि रेफ्रीले पेनाल्टी दिएका थिए । उक्त पेनाल्टीलाई कप्तान मेस्सीले गोलमा परिणत गर्दै टोलीलाई ३-० को अग्रता दिलाए । उनी मैदानमा खेल्नेमध्यमा उत्कृष्ट प्रदर्शन गरेपनि उमेर कम भएकाले अवार्ड लिन असमर्थ भए ।

फाती उमेरले भर्खर १७ वर्ष पुगेका छन् । स्पेनमा १८ वर्ष भन्दा मुनिकाले मदिरा सेवन गर्न नपाइने नियम छ । उमेर नपुगेकाले मदिराजन्य पदार्थ सेवन तथा खरिद विक्री नै गर्न पाइदैन । ला लिगाको म्यान अफ द म्याच प्रायोजन बियरले गरेको कारण फातीले उक्त अवार्ड प्राप्त गर्न सकेनन् । उनको सट्टामा अवार्ड डिफेन्डर जोर्डी अल्बालाई दिइएको थियो ।