एजेन्सी – अर्जेन्टिनी फरवार्ड गोन्जालो हिगुआइनले अमेरिकी मेजर लिग सकरमा इन्टर मायमीका लागि डेब्यु खेलमा नै पेनाल्टी मिस गरेका छन् ।

इटालियन च्याम्पियन युभेन्टसबाट सिजनको सुरुवातमा हिगुआइन फ्री ट्रान्सफरमा इन्टर मायमी पुगेका थिए । आइतबार भएको फिलाडेल्फीया युनियनविरुद्ध खेलमा हिगुआइन पेनाल्टीमा चुक्दा टोलीले ३-० को हार बेहोर्यो । स्कोर २-० को स्थितिमा रहँदा हिगुआइनले पेनाल्टी बाहिर प्रहार गरेका थिए ।

खेलको २० औं मिनेटमा हिगुआइनको सुन्दर प्रयास गोल हुन सकेन । उनले बाइसाइकल किकमा गरेको प्रहार पोस्टमा लागेर फर्कंदा टोलीले अग्रता लिन चुकेको थियो । घरेलु टोली फिलाडेल्फियाले २५ औं मिनेटमा एन्थोनी फोफानाको गोलमा अग्रता लिएको थियो । ६९ औं मिनेटमा इल्सिन्होले गोल गरेपछि टोली २-० ले अघि बढ्यो ।

हिगुआइनले ७७ औं मिनेटमा पेनाल्टीको अवसर सदुपयोग गर्न नसक्दा इन्टरले खेलमा फर्कने अवसर पाएन । हिगुआइनले पेनाल्टी चुकाएलगत्तै विपक्षी खेलाडीसँग वादविवाद भएको थियो । रेफ्रीले दुवै तर्फका खेलाडीलाई संयम बस्न भनेपछि केहिबेर खेल रोकिएर सुरु भएको थियो । ९० औं मिनेटमा ब्रेन्डन आरोनसनले गोल गर्दै घरेलु टोलीको जित पक्का गरे ।

हिगुआइनको यो विभिन्न प्रतियोगिता गरेर लगातार चौथो पेनाल्टी मिस हो ।