एजेन्सी – बार्सिलोनाका मिडफिल्डर मिरालेम प्यानिच विश्व फुटबलका महान हस्ती लिओनेल मेस्सी र क्रिस्टियानो रोनाल्डो दुवैसँग खेल्ने १४ औं खेलाडी बनेका छन् ।

यसै सिजन इटालियन च्याम्पियन युभेन्टसबाट बार्सिलोना पुगेका प्यानिचले आइतबार भिल्लारियलविरुद्ध बार्सिलोनाबाट डेब्यु गरे । उक्त खेलमा मेस्सीसँग मैदान उत्रिएका प्यानिचले त्यसअघि रोनाल्डोसँग युभेन्ट्समा खेलेका थिए । उनीसँगै बार्सिलोनाबाट युभेन्टस पुगेका ब्राजिलियन मिडफिल्डर आर्थर पनि मेस्सी र रोनाल्डो दुवैसँग खेल्ने दुर्लभ सुचिमा सामेल भए ।

डिफेन्डर :

अर्जेन्टिनी डिफेन्डर ग्याब्रीएल हाइन्ज विश्व फुटबलमा मेस्सी र रोनाल्डोसँग खेल्ने पहिलो खेलाडी थिए । उनले सन् २००५ देखि २०१० सम्म राष्ट्रिय टोलीमा मेस्सीसँग खेले । त्यसबीचमा सन् २००४ देखि २००८ सम्म उनी रोनाल्डोसँग पनि म्यानचेस्टर युनाइटेडको जर्सीमा देखिए ।

अर्जेन्टिनी डिफेन्डर इजेकेल गराएले अर्जेन्टिनाको राष्ट्रिय टोलीसँगै सन् २००९ देखि २०११ सम्म रियल म्याड्रिडमा रोनाल्डोको साथ दिएका थिए । गराएले मेस्सीसँग यु-२० विश्वकपको उपाधि जितेका थिए । अर्जेन्टिनाले सन् २०११ र २०१५ को कोपा अमेरिकामा उपविजेता तथा २०१४ मा विश्वकपको फाइनलमा पराजित हुँदा गराए र मेस्सी दुवै राष्ट्रिय टोलीमा थिए ।

बार्सिलोनाका डिफेन्डर जेरार्ड पिके मेस्सी र रोनाल्डो दुवैसँग खेल्ने एकमात्र स्पेनी खेलाडी हुन् । उनी दुवै खेलाडीसँग रहेर च्याम्पियन्स लिग जित्ने पनि एक्ला खेलाडी हुन् । पिकेले रोनाल्डोसँग म्यानचेस्टर युनाइटेडमा तथा मेस्सीसँग बार्सिलोनामा खेल्दै सो उपलब्धि हासिल गरेका हुन् ।

नेल्सन सेमेडो पनि मेस्सी र रोनाल्डोसँग खेल्ने सुचिमा छन् । सेमेडोले पोर्चुगलको राष्ट्रिय टोलीबाट रोनाल्डोको कप्तानीमा यूईएफए नेसन्स लिग उपाधि जितेका थिए । बार्सिलोनाबाट मेस्सीसँग खेल्दा भने सेमेडोले दुई लिग उपाधिसँगै कोपा डेल रे र स्पेनिस सुपर कप जितेका थिए ।

मिडफिल्डर:

फर्नान्डो गागो र लिओनेल मेस्सीले सन् २००८ को बेजिङ ओलम्पिकमा फुटबलतर्फ स्वर्ण पदक जितेका थिए । रोनाल्डो रियल म्याड्रिडमा रहँदा सुरुवाती दुई वर्ष गागो पनि म्याड्रिड टोलीमा नै थिए ।

पोर्चुगलका मिडफिल्डरद्वय आन्द्रे गोमेस र डेकोले पनि दुवैसँग खेलेका छन् । रोनाल्डोसँग राष्ट्रिय टोलीमा साथ निभाएका यी दुईले बार्सिलोनामा मेस्सीसँग खेलेका थिए ।

फरवार्ड :

अर्जेन्टिनी फरवार्ड एन्जल डी मारिया, कार्लोस टेभेज, गोन्जालो हिगुआइन र पाउलो डिबालाले रोनाल्डोसँग क्लब स्तरमा सँगै खेलेका छन् । मेस्सीसँग राष्ट्रिय टोलीमा खेलेका यी खेलाडी फरक क्लबमा रोनाल्डोको सहयात्री बनेका छन् । डी मारियाले रियल म्याड्रिडमा साथ दिँदा टेभेज म्यानचेस्टर युनाइटेडमा रोनाल्डोसँग थिए । हिगुआइन र डिबाला भने युभेन्ट्समा रहँदा संगै थिए ।

हेनरिक लार्सनले पनि मेस्सी र रोनाल्डो दुवैसँग खेल्ने अवसर पाएका छन् । सन् २००६ को च्याम्पियन्स लिग जित्दा मेस्सी र लार्सन बार्सिलोनामा थिए । त्यसपछि अर्को सिजन लार्सन लोनमा म्यानचेस्टर युनाइटेड जाँदै रोनाल्डोसँग खेलेका थिए ।