एजेन्सी – पोर्चुगल तथा पोर्चुगिज क्लब बेन्फिाकाका डिफेन्डर रुबेन डियास इंग्लिस क्लब म्यानचेस्टर सिटीमा अनुबन्धित भएका छन् ।

सिटीले क्लब इतिहासकै कीर्तिमानी मुल्य ६४.३ मिलियन पाउन्डमा सेन्टरब्याक डियासलाई ६ वर्षको लागि अनुबन्ध गरेको हो । यससँगै डियास क्लब इतिहासकै सर्वाधिक महँगा खेलाडी बनेका छन् । यसअघि २०१९ मा सिटीले स्पेनिस क्लब एट्लेटिको म्याड्रिडबाट रोड्रीलाई अनुबन्ध गर्न ६३ मिलियन पाउन्ड खर्चेको थियो ।

२३ वर्षीय डियाससँगको सम्झौतामा सिटीका अर्जेन्टिनी डिफेन्डर निकोलस ओटामेन्डीलाई १३.७ मिलियन पाउन्डमा बेन्फिका पठाउने शर्त रहेको छ । उनी पनि बेन्फिकामा तीन वर्षको लागि अनुबन्ध भएका छन् । डियासले सिटी आउनु अघि नै पोर्चुगलको लिस्वनमा मेडिकल परिक्षण गराएका थिए ।

सिटीमा अनुबन्धित भएसँगै डियासले आफु जित्न मन पराउने खेलाडी रहेको र टोलीका लागि एक खेलाडी हुन पाउदा खुशी लागेको बताएका छन् । गतवर्ष बेल्जियन डिफेन्डर भिसेन्ट कम्पनीलाई गुमाएपछि सिटीको रक्षापङ्तिमा उनीजस्तै डिफेन्डरको अभाव महसुस गरिरहेको थियो ।

सिटीले इटालियन क्लब नेपोलीका कालिदो कौलिबाली, स्पेनिस क्लब सेभियाका जुल्स कुन्डे र एट्लेटिको म्याड्रिडका जोसे जिमिनेज रहेपनि डियास नै सिटीको मुख्य प्राथमिकतामा परेका थिए । डियासले बेन्फिकाबाट १ सय ३३ खेलमा १२ गोल गरेका छन् ।