एजेन्सी – जर्मन सुपर कपको उपाधिका लागि आज बुधबार राति जर्मन बुन्डेसलिगाका दुई ठूला महारथी बायर्न म्युनिख र बोरुसिया डर्टमुन्डबीच प्रतिस्पर्धा हुँदैछ ।

खेल एलिएन्ज एरिनामा नेपाली सयमअनुसार राति १२ः१५ बजे हुनेछ । घरेलु मैदानमा हुने खेलमा बायर्न डर्टमुन्डलाई पराजित गर्दै सिजनको दोस्रो उपाधि जित्ने दाउमा हुनेछ । बायर्नले सिजनको सुरुवातमा २५ सेप्टेम्वरमा युइएफए सुपरकपमा स्पेनिस क्लब सेभियालाई पराजित गर्दै उपाधि जितेको थियो ।

तर, त्यसपछि जर्मन बुन्डेसलिगाको खेलमा टीएसजी होफेनहाइनसँग ४–१ ले पराजित भएको बार्यन डर्टमुन्डविरुद्ध सम्हालिएका खेल्नेछ । होफेनआइनसँगको हारको पिडा डर्टमुन्डविरुद्ध लिँदै बायर्न जितको लयमा फर्कने लक्ष्यमा हुनेछ ।

बायर्नसँग रोबर्ट लेवान्डोस्की, थोमस मुलर, सर्ज जिनाब्री, किङ्सले कोमन, जोसुआ किम्मिच, लियोन गोरेट्जका,निकलस सुल, जेरोमी बोएटिङ, लुकास हर्नान्डेज, बेन्जामिन पाभार्ड र कप्तान तथा गोलरक्षक म्यानुयल नोयरलगायतको खेलाडी हुनेछ । लिरोए सानेले ह्यामस्ट्रिङ इन्ज्युरीका कारण डर्टमन्डविरुद्धको खेल गुमाउन सक्नेछ ।

यता, डर्टमुन्ड पनि बायर्नलाई उसकै मैदानमा पराजित गर्दै सिजनको पहिलो उपाधि जित्ने दाउमा हुनेछ । बुन्डेसलिगाको खेलमा अग्सवर्गसँग २–० ले स्तब्ध भएको डर्टमुन्ड पनि बायर्नलाई पराजित गर्दै जितको लयमा फर्कन चहान्छ ।

अग्सबर्गविरुद्धको खेलमा नजमेका एर्लिङ ब्राउट हालान्ड र जाडोन सान्चो नै टोलीको मुख्य हतियार हुनेछ । कप्तान मार्काे रिउसले चोटबाट पूनरागमन गर्न सक्नेछन् । राफयल गुरेरो, जुलियन ब्रान्ड्ट, लुकास्ज पिस्जिक, म्याट हमेल्स, इम्री क्यान र गोलरक्षक रोमन बुर्की रहनेछन् ।

यी दुई टोलीको पछिल्लो ३४ खेलको नतिजा हेर्दा बायर्न अघि देखिएको छ । बायर्नले १६ खेलमा सफलता हात पार्दा डर्टमुन्डले १२ खेले जितेको छ । ६ खेल बराबरीमा सकिएको छ । पछिल्लो दुई खेलमा बायर्नले डर्टमुन्डलाई हराएको छ । गत वर्षको सुपर कपमा डर्टमुन्डले बायर्नलाई २–० ले पराजित गर्दै उपाधि जितेको थियो ।