एजेन्सी – इंग्लिस फुटबल लिग (इएफएल) कप अर्था कारवाओ कपको चौथो चरणमा प्रिमियर लिगमा दुई क्लब म्यानचेस्टर सिटी र बर्नलीबीच प्रतिस्पर्धा हुँदैछ ।

खेल बर्नलीको मैदान टर्फ मुरमा नेपाली समयअनुसार राति ११ः४५ बजे शुरु हुनेछ । घरेलु टोली बर्नलीलाई पराजित गर्दै सिटी कारवाओ कपको पाँचौ चरणमा पुग्ने दाउमा हुनेछ । तर, मुख्य खेलाडीहरु चोटसँग जुधिरहेका कारण टोलीलाई बर्नलीविरुद्धको खेल सहज हुनेछैन ।

ग्याब्रियल जेसस, बर्नार्डाे सिल्भा, इल्केए गुन्डोगान, जोओ क्यान्सिलो, जोन स्टोन्स र सर्जियो अगुइरो चोटका कारण टोलीसँग उपलब्ध हुनेछैन । सिटीसँग रहिम स्ट्रलिङ, रियाद महारेज, केभिन डि ब्रुयन, फिल फोडेन, फर्नाडिन्हो, रोड्री, नाथम एके, केएल वाल्कर, इरिक गार्सिया, बेन्जामिन मेन्डी र गोलरक्षक इडर्सन मोराइसको साथ रहनेछ ।

यता, चोटसँग जुधेर संघर्ष गरिरहेको सिटीलाई पराजित गर्दै बर्नली पनि पाँचौ चरण पुग्ने लक्ष्यमा हुनेछ । क्रिस वुड, एस्ले वेस्टवुड, केभिन लङ, जिम्मी डुम्नी, चार्ली टेलर र निक पोपे टोलीसँग रहनेछ ।

यि दुई टोली हालसम्म १२ पटक प्रतिस्पर्धा गर्दा ९ खेलमा सिटी विजयी भएको छ । एक खेल बर्नली आफ्नाृ पक्षमा पार्दा दुई खेल बराबरीमा सकिएको छ । बर्नली २०१५ को प्रिमियर लिगमा सिटीलाई १–० ले पराजित गरेको थियो । त्यसयताको १० खेल मध्ये सिटी ९ खलेमा विजयी भएको छ ।

अन्य खेल

ब्राइटनविरुद्ध म्यानचेस्टर युनाइटेड (राति १२ः३० बजे), एभर्टनविरुद्ध वेस्टह्याम (राति १२ः३० बजे)