एजेन्सी – लिओनल मेस्सीले आफ्नो उच्च प्राथमिकतामा बार्सिलोना रहेको स्वीकार गरेका छन् । अर्जेन्टिनी सुपर स्टार मेस्सीले गत महिना सबैलाई आश्चार्यमा पार्दै क्लब छाड्ने अनुमती दिन पत्राचार गरेका थिए ।

तर, उनको चाहना अनुसार क्लबले छाड्न नमानेपछि इच्छा नहुँदा पनि मेस्सी बाँकी सम्झौताका लागि बार्सिलोनामै बस्न तयार भएका हुन् ।

‘थुप्रै असहमतिका बीचमा पनि यो अभियानलाई अन्तिम सम्म लान चाहन्छु । बार्सिलोनाका सबै एकै ठाँउमा आउनुपर्दछ जसले अघि बढ्न सकिन्छ,’ उनले भने, ‘धैर्यता र उत्साहले हामी लक्ष्यमा पुग्दै थप उपलब्धि हासिल गर्न सक्छौं । सहि दिनका लागि हामी एक भएर अघि बढ्न पर्दछ ।’

मेस्सीले आफ्नोतर्फबाट केहि गल्ति भए त्यसको जिम्मेवारी लिने पनि बताएका छन् । ‘यदि कोहि पनि उत्साहित छ भने त्यो बार्सिलोना अझै उत्कृष्ट र बलियो बनाउनका लागि हो,’ उनले थपे, ‘म हाम्रा सबै सदस्यलाई सन्देश दिन चाहन्छु । हामीलाई साथ दिनुहोला । कुनै बेला प्रस्ताव आए होलान् । अब त्यसमा द्धिविधा नराखौं । क्लबलाई कसरी राम्रो गर्न सकिन्छ भन्नेमा म केन्द्रित छु ।’

बार्सिलोनाले लिगको पहिलो खेलमा भिल्लारियललाई ४-० ले पराजित गर्दै सुखद सुरुवात गरिसकेको छ । अन्सु फाती र मेस्सीको तालमेल मिलेको खेलमा बार्सिलोनाले बलियो भिल्लारियलमाथि दवाव कायम गरेको थियो ।