एजेन्सी – खेल चलिरहेको अवस्थामा खेलाडीलाई शौचालय जानुपरेको अवस्थामा धेरैले हाफको अन्त्यसम्म कुर्छन् । तर मंगलबार चेल्सी र टोटेनहमबीच भएको काराबाओ कपको खेलमा डिफेन्डर एरिक डाएरले रोक्न सकेनन् र खेल छाडेर शौचालयतर्फ लागे ।

खेलको ७६ औं मिनेट चलिरहँदा टोटेनहम चेल्सीसँग १-० ले पछि परेको थियो । टोटेनहमका मुख्य डिफेन्डर रहेका डाएर एक्कासी मैदान छाडेर ड्रेसिङ रुमतर्फ गए । आफ्नो खेलाडी एक्कासी मैदान छाडेपछि प्रशिक्षक जोसे मोउरिन्हो पनि उनकै पछि कुद्दै भित्र पसे । तर डाएर दुई मिनेट नबित्दै पुन: मैदान फर्किए । उनको पछिपछि मोउरिन्हो पनि बेन्चमा आए ।

खेलको ८३ औं मिनेटमा टोटेनहमले गोल फर्कायो । टिमो वेर्नरको गोलमा पहिलो हाफमा अग्रता लिएपनि चेल्सीले टाइब्रेकर भने पराजय भोग्नुपर्यो । दोस्रो हाफमा मैदान छाडेर बाहिर गएका डाएरले टाइब्रेकरमा पहिलो प्रहार गर्दै गोल समेत गरेका थिए । चेल्सीको अन्तिम प्रहार गरेका मेसन माउन्ट चुक्दा चेल्सी ५-४ ले पराजित भएको थियो । डाएरले जितको खुसी मनाउनु अघि माउन्टलाई सहानुभूति समेत दिए ।

डाएर खेलको म्यान अफ द म्याच समेत चुनिए । उनले खेलपछि आफ्नो म्यान अफ द म्याच ट्रफीलाई शौचालयमा राखेको तस्बिर राख्दै मजाक समेत गरेका थिए । उनले तस्बिरमा क्याप्सन लेखेका थिए, ‘द रियल म्यान अफ द म्याच’ अर्थात म्यान अफ द म्याचको असली हकदार ।

खेलपछि डाएरलाई मैदान छाडेका कारणबारे सोध्दा उनको उत्तर यस्तो थियो, ‘ जब तपाईंलाई जानुपर्छ, तब जानैपर्छ । मैले आइतबार खेल खेलेर आज फेरी पूरा खेल्दा सहज अवस्था थिएन । प्रशिक्षक मेरो निर्णयलाई लिएर पक्कै खुसी थिएनन् । धन्न टोलीले गोल खाएन र हामी समस्यामा परेनौं ।’

यता प्रशिक्षक मोउरिन्होले खेलाडीको प्रशंसा गर्दै उक्त घटनाबारे यस्तो अभिव्यक्ति दिए । ‘समस्या यो थियो की उनलाई पिसाब लागेको थिएन । डाएरलाई जे भयो त्यो सामान्य थिएन । मैले उनको विशेष प्रशंसा गर्नेपर्छ,’ उनले भने, ‘कुनैपनि खेलाडीले ४८ घन्टाको अन्तरमा २ खेल खेल्नुपर्छ भने समस्या आउनु स्वभाविक हो । हाम्रो सबै खेलाडी परिवर्तन सकिएको थियो र १० खेलाडीमात्र खेल्नु सहज थिएन । म उनलाई छिटो सक्काउन दबाब दिन भित्र गएको थिएँ ।’