एजेन्सी – ला लिगाका सुरुवाती दुई खेलमा शत प्रतिशत नतिजा निकालेको बार्सिलोनाले तेस्रो खेलमा बराबरी मात्र गर्न सक्यो । सेभिल्लासँग आइतबार १–१ को बराबरीपछि बार्सिलोना प्रशिक्षक रोनाल्ड कोम्यानले खुलेर टोलीको प्रदर्शनको समिक्षा गरेका छन् ।

टोलीको खेलबाट सन्तुष्ट नै देखिएका डच प्रशिक्षकले कहाँ कहाँ कमजोरी रहेको भन्ने पनि प्रष्ट पार्न चाहे । त्यहि क्रममा उनले सेभिल्लाको प्रदर्शनको चर्चा पनि गरे । ‘खेल कठिन थियो । उनीहरुले हामीलाई दबाबमा राखे । जसरी हामीले खेल्न चाहेका थियौं त्यसरी सकेनौं हाम्रो समस्या त्यहि भयो’, कोम्यानले खेलपछि भने, ‘उनीहरुले राम्रो फुटबल खेले । शारीरिक रुपमा उनीहरुले हामीमाथि दबाब बनाइराखे । उनीहरु हामी भन्दा माथि देखिए ।’

कोम्यानले सेभिल्लालाई माथिल्लो स्तरको टोली भन्न छुटाएनन् । ‘मलाई लाग्छ हामीले राम्रो खेल्यौं । तर दोस्रो हाफमा धेरै समय हामीले बल नियन्त्रणमा राख्न सकेनौं । त्यस कारण पनि हामीले खेलमा लय बनाउन सकेनौं’, उनले विश्लेषण थियो, ‘म खेलाडीको प्रदर्शनबाट सन्तुष्ट छु । टोली थकित थियो । तर हामीले अन्तिम सम्म पनि लड्यौं । हामीले उत्कृष्ट प्रतिद्वन्द्विसँग खेल्यौं ।’

फिलिपे कौटिन्होको गोलमा बार्सिलोनाले बराबरी गरेको थियो । कोम्यानको प्रशिक्षणमा कौटिन्होले सबै खेलमा पहिलो रोजाईमा खेलिरहेका छन् । ‘उनलाई आत्मविश्वासका लागि आफ्नो प्रशिक्षकबाट सहयोग चाहेका छन् । तर उनीले त्यहि अनुसार प्रदर्शन पनि गर्नुपर्ने हुन्छ’, कोम्यानले कौटिन्होका तारिफ गर्दै भने, ‘उनले राम्रो खेलिरहेका छन् । उनको प्रदर्शनले पनि उनी उत्कृष्ट खेलाडी भएको देखाउँछ ।’

अर्कोतर्फ लगातार दोस्रो खेलमा कोम्यानले एन्टोइन ग्रिजमनलाई परिवर्तन गरेका थिए । सेल्टा भिगोविरुद्धको परिवर्तन ट्याकटिकल थियो । ‘त्यो खेलमा अन्सु फातीले दबाब सृजना गरिरहेका थिए । भिगोविरुद्ध हामीले १० खेलाडी भएपछि ग्रिजमनलाई परिवर्तन गरेका थियौं, उनले भने, ‘सेभिल्लाविरुद्ध ग्रिजमनले कम्तीमा एक गोल गर्नुपर्ने कोम्यानको बताए । उनले दुई वटा मौका पाएका थिए । त्यो स्तरको खेलाडीले कम्तीमा २ वटा मौकामा एउटा गोल गर्नै पर्थ्यो ।’