एजेन्सी – इंग्लिस क्लब आर्सनलले स्पेनिस क्लब एट्लेटिको म्याड्रिडका मिडफिल्डर थोमस पार्टीलाई अनुबन्ध गरेको छ ।

आर्सनलले घानाका मिडफिल्डरलाई ४५ मिलियन पाउन्डमा समर ट्रान्सफर (खेलाडी सरुवा) को डेडलाइन डेको अन्तिम दिन अनुबन्ध गर्न सफल भएको हो । उनले आर्सनलमा १८ नम्वरको जर्सी प्रदान गरिएको क्लबले जनाएको छ ।

आर्सनलले यसअघि नै पार्टीलाई अनुबन्ध गर्न चासो देखाएपनि डेडलाइन डे मा मात्रै अनुबन्ध गर्न सफल भएको हो । इएसपिएनका अनुसार २७ वर्षीय मिडफिल्डरलाई ४ वर्षको लागि अनुबन्ध गरिएको र थप पनि हुन सक्ने बताइएको छ ।

आर्सनलका मुख्य प्रशिक्षक मिकेल अर्टेटाले क्लबको अफिसियल वेवसाइटमा क्लबले स्तरीय खेलाडी अनुबन्ध गर्न सफल भएको बताएको छ । ‘उनले एट्लेटिको म्याड्रिडबाट स्पेनिस ला लिगा र च्याम्पियन्स लिगमा उच्च प्रदर्शन गरिरहेका छन् । हामी उनको प्रदर्शनबाट प्रभावित छौं । उनले आर्सनलका लागि केही गर्न सक्नेछन् ।’ प्रशिक्षक अर्टेटाले भने ।

पार्टी अन्तर्राष्ट्रिय ब्रेकपछि आर्सनलको प्रशिक्षण जोडिनेछ । पाटी आर्सनलमा अनुबन्ध हुदा आर्सनलका मिडफिल्डर लुकास टोरेइरा एक सिजनको लागि लोनमा एट्लेटिको पुगेका छन् । यस्तै आर्सनलका माटियो गुइनडोउजी जर्मन क्लब हर्था बर्लिनमा लोनमा अनुबन्ध भएका छन् ।